Бу – Мииринэйтэн илинтэн киириигэ турар бөдөҥ түөлбэ (микро-оройуон) буолар. Үксэ мас, буолаары буолан "Бүөт Бөтүрүөп" саҕанааҕы эргэ, самнайбыт дьиэлэр. Маннык микро-оройуоннаахпыт.
Алмаастаах куорат "сэбэрэтин" сүрдээҕин ньүдьүрэтэр көстүүлээх миэстэ. Звезднай уулуссаҕа турар икки этээстээх дьиэлэри күрдьэргэ уолдьаста буолуохтаах. Ону бэйэтин дьаалатынан ыыппыттара өтө көстөр. Түөлбэ аанньа тупсарыллыбат, оҥоһуллубат, көҕөрдүллүбэт, быраҕыллыбыт курдук. Аны туран кытыы Интернациональнай, Лесной уулуссаларга уот-күөс мөлтөҕүн кэлин үгүс үҥсүү кэнниттэн арыый ама оҥордулар.
Чааһынайдар олорор сирдэригэр итии, тымныы уу утума суох. Гаас уматык тардыллар кэскилэ мэлигир. Үөһээ бөһүөлэк кытыытыгар самнайбыт дьиэлэргэ, былыргылыы оһоҕунан оттунан олороллор. Маспыт сыаната сиэрэ суох ыарахан. Дьон чоҕунан оттуна сатыыр.
Сорохтор урут уот лиинньийэтиттэн быһа холбонор этилэр. Ол курдук алмаас таастаах баай Мииринэй куорат кытыытыгар, мас дьиэлэр олохтоохторо өрөспүүбүлүкэ түгэх тыаларыгар курдук оһоҕу кэтииллэр-маныыллар. Дьиҥэр, гаас утума Мииринэйгэ кэлбитэ быданнаата ээ. Куорат арҕаа өттүгэр бытааннык да буоллар гаас киирэр. 40-ча чааһынай дьиэҕэ гаас киирбитэ. Онно холоотоххо Үөһээ бөһүөлэккэ гаас киирэр кыаҕа суох. Ону олохтоохтор куорат, оройуон саламтатыгар муҥнарын ытаабыттара ыраатта. Үөһээ бөһүөлэккэ урут дьон дьиэ туттуох буолан испиттэрэ. Билигин ол тохтоон турар. Урут манна маҕаһыын арааһа баар этэ. Ол иһигэр кууһунан атыылыыр лааппылар бааллара. Олор сабыллан хааллылар.
2000 сыллардаахха Үөһээ бөһүөлэк Звезднай уулуссатыгар супермаркет баара. Ол тоҕо эрэ уурайбыта.
2011 сыллаахха урбаанньыт Н.П.Герасимова "Татыйыына" маҕаһыына аһыллан, Сунтаар этин, арыытын, барыанньатын атыылаан абыраан испиттэрэ. Сыаналара атын маҕаһыыннардааҕар удамыр этэ. Ону, бука, сүгүн үлэлэппэтилэр быһыылаах. Маҕаһыын сабыллыбыта ыраатта.
Ити курдук Үөһээ бөһүөлэккэ балачча үгүс маҕаһыын сабылынна. Арай, "Айхал" диэн ааттаах арыгы маҕаһыына үлэлии турар. Оскуола, дьыссаат саастаах оҕолордоох дьоҥҥо бөрүкүтэ суох. Кафе, оҕолорго аналлаах кондитерскай эҥин мэлигир. 5-с остолобуой сабыллан баран, суоппардар аһыыр сирдэрэ буолла. Куорат киинигэр успуордунан дьарыктанарга анаан баскетболлуур сири тутаннар, оҕо-аймах үөрүүлэрэ үгүс. Үөһээ бөһүөлэккэ бу татым. Эгэ, дьоҕус стадион кэлиэ дуо? Суох. Оҕо былаһаакката да сэдэх. Мииринэйгэ киирээти кытары биллэр-көстөр миэстэ ааттаах эрээри, туох да киэргэтии, тупсарыы мэлигир. Туох да саҥа тутуу суох. Барыта эргэ-урба. Үөһээ бөһүөлэк хаһааҥҥа диэри маннык сатаҕайдык олорор?
Станислав Алексеев, Мииринэй куората. Ааптар хаартыскалара.
