Оччугуй Ботуобуйа үрэх күргэтэ үлэҕэ киирэрэ сэттэ эрэ ый хаалла. Аныгыс кыһыҥҥа үктэниигэ диэри бэлэм буолуохтаах. Муостаны тутар “РНГ” ньиэп-гаас хампаанньатын бэдэрээччитэ – “Востоксибспецмонтаж”(Москуба) тэрилтэ, бу дьыл алтынньы 31 күнүгэр үлэ түмүктэнэр диэн эрэннэрбитэ.
Мииринэй оройуонун дьаһалтата тохсунньу 21 күнүгэр таһаарбыт, “Ленина 19” хомуур отчуотугар бу туһунан маннык суруйар: ”Ааспыт сылга Оччугуй Ботуобуйа күргэтин тутууга 711 864,40 тыһ солк суумалаах үлэ ыытыллынна. 2020 сылга 672.781,6 тыһ солк ороскуоттаныахтаах”. Оттон үлэ хайдах тэтимнээхтик барарый? Тус бэйэм бу күргэ тутуутун дөрүн-дөрүн баран хаартыскаҕа түһэрэбин. Сайын, күһүн, кыһын оройугар хаста да бара сырыттым. Улахан тымныылар саҕана тутуу былаһааккатыгар чуумпу этэ. Оттон бу күннэргэ Оччугуй Ботуобуйа күргэтин тутуутун үлэтэ бара турар. Үрэх бэтэрээ өттүгэр быраҕыллыбыт Новай (МУАД) бөһүөлэгэр, күргэни тутааччылар “РНГ” диэн суруктаах маҥан богуоннара тураллар. Суол “чанчыгар” сыппыт күргэ элээмэлэрин таҥмыттар. Тиэхиньикэ аҕыйах, дьон онон-манан көстөллөр. Дьэ, бу дьон саараама, биир-икки тылы хоруйдаабаттар. Биричиинэтэ биллэр.
2019 сыллаахха сайын, “күргэ тутуута номнуо саҕаланна” диэн Саха сирин уһаты-туора арааппардаммыта. Ону бэс ыйын 24 күнүгэр бэрэбиэркэлээбитим. Туох да суох этэ. Тиэхиньикэ да, дьон да. “Оччугуй Ботуобуйа кытылыгар туох да тутуу сибиэнэ көстүбэт” диэн фоторепортаж оҥорбутум. Элбэх хаартыскананан сигэлээн, муоста тутуутун иилиир-саҕалыыр дьону өһүргэппиппин. Аахпыттар эбит. Социальнай ситимнэргэ миэхэ туһуламмыт сиэрэ суох суруктар тахсыбыттара. Чунуобунньуктар, испиэстэр уонна Дьокуускай суруналыыстара “сиикэйдээбиттэрин” арыйаммын, ыҥырыа уйатын тоҕо тардыбытым.
Ахсынньы 2 күнүгэр “Yakutiafuture.ru” порталга: “Станислав, тутуу бара турар, кэлэн көр” диэн ыстатыйам анныгар суруйууларга (комментарийдарга), чопчу миэхэ аадырыстаан арыый да сайаҕастык суруйбуттара. Ону баара ким да ыҥырыыта суох эбийиэги көрө сылдьабын. Ааспыт кыһыны быһа сүүрбэччэ туонна уйуктаах КАМАЗ-тар буор көһөҥөтүн тиэйэн ахан биэрдилэр. Быйыл алтынньы 31 күнүгэр, “ВССМ” Оччугуй Ботуобуйа үрэҕин туоруур 191 миэтэрэ усталаах, үс систээх, икки биэрэстэ киирии аспаал суоллаах күргэни дьэндэтэр диэн үгүс отчуоттарга этилиннэ. Аны Дьокуускай бөдөҥ иһитиннэрэр саайтара, 2019 сыл алтынньытыгар МУАД понтуон-муостата хомулунна диэн суруйа охсубуттара. Сымыйалара, хомуйбатахтара! Бу хаартыскаларга понтуон кыс хаар түһүөн аҕай иннинэ. Понтуону, күргэни тутааччылар, тиэхиньикэ үрэҕи уһаты-туора сырыытыгар наада диэн хааллартарбыттара. Буорунан-тааһынан бүрүйбүттэрэ. Билигин хаар, муус, таас быыһыктаах сытар. Оттон аны икки ыйынан, Оччугуй Ботуобуйаҕа халаан буоллаҕына, понтуону барылҕан тоҕу анньыан, үрэх устун ыһан кэбиһиэн сөп. Оччотугар Мииринэйтэн Сунтаардыыр дьон, бу үрэҕи хайдах туорууллар? Оччугуй Ботуобуйа халааннаан турар кэмигэр хайдаҕын хаартыскатын ыытабын. Өрүс курдук кэҥиир. Аны хайа үрэҕэ буолан, сүүрүгэ дохсун. Дьэ онон, сүрдээх эппиэттээх кэмнэр кэлэн иһэллэр. Бу сайынтан уонна кэлэр күһүнтэн быһаччы тутулуктаах, күргэ тутуута бүтэрин, бүппэтин дьылҕата. Кылаабынайа, күргэ тутуута үтүмэн сылларга тохтоон эрэ хаалбатыгар баҕарабын.
Станислав Алексеев, Мииринэй куората. Сунтаар улууһун бассаап бөлөҕүттэн уонна ааптар хаартыскалара.
