ХИФУ ординатордара коронавируһу бохсор дьаһалларга күргүөмүнэн кытталлар. 253 ординатор Дьокуускай поликлиникаларыгар, 10 ординатор ХИФУ клиникатыгар үлэлиир, өссө 14 ординатор Мииринэйгэ көппүт.
Бу эпидемияны утары охсуһар дьаһалларга кыттар оҕолор ХИФУ Мэдэссиинэ институтун бастакы уонна иккис сыллаах ординатордара, кинилэр бары быраас дьупулуомнаахтар. Баҕа өттүлэринэн бу дьаһалларга кыттыһар ординатордар дьон температуратын кээмэйдииллэр, ыарыыга уорбаланар, температуралаах дьону булан изоляцияҕа ыыталлар. Куорат мэдэссиинэ тэрилтэлэрин үлэһиттэрин күүһүрдэр бырагырааманы доруобуйа харыстабылын министиэристибэтэ көҕүлүүр, оттон Мииринэйгэ баҕа өттүнэн барар ординатордары АЛРОСА хампаанньа кэлэр-барар ороскуоттарын, олорор, аһыыр усулуобуйаларын үбүлүүргэ ылыммыт. Мэдэссиинэ институтун Дьупулуом кэннинээҕи үөрэх факультетын декана Анна Протопопова этэринэн, АЛРОСА хампаанньа Арассыыйаҕа бу COVID-19 буллуллаатын кытары, вахтанан кэлэр үлэһиттэри көрөргө көмө көрдөөн тахсыбыт. Ординатордар кулун тутар 21 күнүгэр алмаастаах провинцияҕа көппүттэр. Кинилэри АЛРОСА уопсайдарыгар олохтообуттар.
