Ил Дархан Айсен Николаев хоруона вируһа тарҕамматын туһугар эбии миэрэлэри ылла. Ол туһунан суһал штаб иһитиннэрэр.
Дойду бэрэсидьиэнэ Владимир Путин ыйааҕынан, кэлэр нэдиэлэҕэ – кулун тутар 28 күнүттэн муус устар 5 күнүгэр диэри, бас билииттэн тутулуга суох атыы-эргиэн кииннэрэ (ас атыылыыр маҕаһыыннартан ураты) үлэлэрин тохтотоллор. Ол курдук аралдьытар кииннэр, атыы-эргиэн кииннэрэ, дьаармаркалар;
– успуорт тэрилтэлэрэ: хаҥкылатар, хайыһар уларсар сирдэр, муус, хайа хайыһарын пааркалара, баазалара о.т.д.;
– Фитнестыыр, эрчиллэр зааллар, кулууптар, сауналар, бассейнар;
– Көмпүүтэр кулууптара, зааллара;
– Парикмахерскайдар, солуоннар, спа-кииннэр, массажтыыр кабиниэттэр;
– Чааһынай уһуйааннар, оҕону көрөр бөлөхтөр.
Уопсастыбаннай аһылык тэрилтэлэрэ тиэрдэн биэрии өҥөтүн тэрийиэхтээхтэр.