Оччугуй Ботуобуйа үрэх күргэтэ тутуу бу дьыл алтынньы ыйыгар диэри бэлэм буолуохтаах диэн иһитиннэрбиттэрэ. Күргэни тутар бэдэрээччит тэрилтэ “Востоксибспецмонтаж” буолар. Бу күннэргэ балачча үлэни ыыппыт, ону бу хаартыскаларга көрөҕүт.
Ол курдук хаҥас уонна уҥа кытыллары холбуур күргэ тутулун ыстаал-тимир тиһиктэрэ ыпсарыллыбыттар. Аны бөҕөргөтүү үлэтэ барыан наада. 191 миэтэрэ усталаах, түөрт тулааһын систээх, икки биэрэстэ киирии аспаал суоллаах күргэни дьэндэтии – сүрдээх баараҕай тутуу. Дьон коронавирус тарҕанар кутталын дьалхаана, күргэ тутуутугар дьайыа диэн куттаналлар. Тоҕо диэтэххэ, күргэни тутааччы бэдэрээччит Москуба куорат тэрилтэтэ буолар. Бары кэлэ-бара сылдьар баахта дьоно. Онон, үөйбэтэх өттүттэн буулаатаҕына, күргэ тутуута үтүмэн сылларга тохтоон хаалыан эмиэ сөп. Оннук эрэ буолбатар. Күргэни тутааччылар баахта ньыматынан үлэлииллэр. Кэлиилэрэ-барыылара Мииринэй аэропуордун нөҥүө. Ол дьаҥ күүһүрдэҕинэ, сырыы хаарчахтанара чуолкай.
Онон, тутааччылар ханна да халбарыйбакка үлэлии хааллахтарына эрэ, дьыала тиһэҕэр тириэрдиллэр туруктаах. Биир киһи сэрэхэдийэр боппуруоһа – аны саас, сайын, Осетрово пуордуттан Өлүөнэ өрүһүнэн күргэ тутуутугар аналлаах тиэхиньикэ, тэриэбэ, матырыйаал кэлиитэ. Ол харгыстанна да эмиэ боппуруос “хаахтыйыан” сөп. Бачча тутуллан испит күргэ тутуута быраҕыллан, тохтоон хаалбатын туһугар, сакаасчыкка – “А-331 Бүлүү” федеральнай суол саламтатыгар эрэ эрэнэрбитигэр тиийэбит.
Станислав Алексеев. Мииринэй куората.
