Таатта улууһун Ытык Күөлүгэр олохтоох көҕүлээһини өйүүр бырагыраама сүнньүнэн Герой Федор Охлопков аатынан сынньалаҥ пааркатыгар саҥардыы үлэтэ ыытыллар.
Үлэ уопсай суумата 7,990 мөл. солк. Мантан 600 тыһ. солк. улуус бүддьүөтүттэн көрүллүбүт, 450-нуу тыһ. солк. Харбалаахтааҕы чох разреһа уонна «Тааттаавтодор» тэрилтэ көмөлөспүттэр. Маны тэҥэ 490 тыһ. солк. Ытык Күөл олохтоохторуттан хомуллубут.
Тутуу генеральнай бэдэрээтчигинэн «Уран» дизайн-устуудьуйа буолар. Урукку мас трибуна көтүрүллэн, ыраастаммытын кэнниттэн, кулун тутар 12 күнүттэн сөргүтүү үлэтэ саҕаламмыт. Нам, Таатта сварщик уолаттара тимири тимиргэ силимнээн, олорор ыскаамыйа холлоҕоһун оҥороллор. Киин трибуналыын, икки кынаттыын. Манна барыта 2000 киһи олорор кыахтаныаҕа.
1945 сыллаахха «уруй-айхал» тылларынан доҕуһуолланан, Кыайыы ыһыаҕа ыһыллыбыт пааркатыгар Таатта дьоно Улуу Кыайыы өрөгөйдөөх 75 сылын параадынан уруйдуоҕа.
Жанна БУРМИСТРОВА, ulus.media/
