Войти

Войти

Айсен Николаев өрөспүүбүлүкэҕэ коронавируһунан сибээстээн Дьокуускайга, Жатайга, Нерюнгрига уонна Мииринэйгэ толору изоляцияланыы эрэһиимин биллэрдэ. Бу туһунан кини кулун тутар 30 күнүгэр 23 ч. тэлэбиисэринэн өрөспүүбүлүкэ олохтоохторугар анал иһитиннэриитигэр эттэ.

«Бүгүҥҥү киэһэттэн Дьокуускай куоракка, Жатайга, Нерюнги уонна Мииринэй оройуоннарыгар толору изоляцияланыы эрэһиимэ биллэриллэр. Бу куораттар Саха сиригэр кэлии-барыы аартыгынан аатыраллар. Дьокуускайга ыарыһахтар номнуо бэлиэтэммиттэрэ, оттон атыттарга тарҕанар кыаҕа улахан», — диир Айсен Сергеевич.

Убаастанар улахан кыһалҕалаах эрэ дьон дьиэлэриттэн тахсыахтарын сөп: үлэҕэ барыы, чугас маҕаһыыҥҥа, бөх тоҕо уонна дьиэ кыылын күүлэйдэтэ тахсыы эрэ көҥүллэнэр. Онон дьиэҕэ олоруҥ!

Маны сэргэ, кулун тутар 31 күнүттэн муус устар 6 күнүгэр диэри Дьокуускайга, Жатайга, Нерюнгригэ уонна Мииринэйгэ арыгы атыыта хааччахтанна.

«Урбаанньыттар хааччахтааһын ирдэбилин кэспэккэ, эппиэтинэстэрин көрдөрөллөрө ирдэнэр. Саха сирин олохтоохторун доруобуйатын уонна олоҕун харыстааһын боппуруоһа тыҥаан турар кэмигэр, барыыс туһунан саныыр бириэмэ буолбатах. Аччыгый биисинэһи хайаан да өйүөхпүт, ол иннинэ коронавируһу кыайыахпытын наада. Билигин сүрүн уонна соҕотох суолталаах боппуруоһунан — дьон доруобуйата буолар!», — диэн Айсен Николаев тоһоҕолоото.

Маннык кытаанах миэрэлэр вирус тарҕаныытын тохтотор сыалтан ыытыллаллар. “Быраабылалары тутуһуу уопсастыба түмсүүтүн уонна өрөспүүбүлүкэ хас биирдии олохтооҕун эппиэтинэһин көрдөрөрүн бэлиэтиир”, - диэн Ил Дархан этэр:

«Бу ыарыы ордук саастаах дьону харыстаабат, атыттарга да улахан охсуулаах. Биһиги бары бииргэ түмсэн, бу ыарыыны билигин тохтотуохтаахпыт, салгыы тарҕаныытын таһаарыа суохтаахпыт. Күндү Сахам сирин олохтоохторо! Бары күүстээх уонна эппиэтинэстээх буолуоххайыҥ, бэйэ бэйэбитин өйүөххэйиҥ! Бииргэ түмсүүлээх эрэ буоллахпытына тулуһуохпут уонна кыайыахпыт!», — диэн Айсен Николаев Саха сирин олохтоохторугар анал туһаайыытын түмүктээтэ.

Тарҕат:

Добавить комментарий