Коронавирус дьаҥынан сибээстээн, 1-кы №-дээх Өрөспүүбүлүкэтээҕи балыыһа – Национальнай мэдэссиинэ киинэ үлэтигэр кэккэ уларыйыылар киирдилэр. Бу туһунан СӨ Доруобуйа харыстабылын министиэристибэтэ иһитиннэрэр.
Суһал көмөнү оҥорбот, консультацияны биэрэр поликлиника чааһа (оҕо поликлиниката, офтольмологическай поликлиника, консультативнай-стоматологическай поликлиника) үлэтин тохтотто. Улахан дьону консультациялыыр поликлиника эмиэ быстах кэмҥэ сабылынна.
Өрөспүүбүлүкэтээҕи маммология киинэ толору күүһүнэн үлэлии олорор. Манна онкология чааһынан эрдэтээҥҥи диагностиканы оҥорорго улахан болҕомто ууруллар.
Перинатальнай киин консультациялыыр салаалара быһаҕас эрэһииминэн үлэлииллэр.
Ити үлэлэрэ тохтообут поликлиникалар персоналлара коронавирус дьаҥынан сибээстээн уларытыллыбыт Өрөспүүбүлүкэтээҕи клиническэй балыыһаҕа Дьокуускай олохтоохторугар суһал көмөнү оҥорорго көмөҕө бардылар.
Клиническэй киин эпэрээссийэлиир куойкаларыгар ыарахан туруктаах, суһал эпэрээссийэҕэ наадыйар онкология, сүрэх-тымыр хирургията, нейрохирургия, урология ыарыһахтарыгар оҥоһуллар.
Педиатрия киинэ төгүрүк суукка устата суһал көмөҕө наадыйар оҕолору ыла олорор. Маннык эрэһииминэн Перинатальнай киин хат дьахталларга уонна эһээхэй оҕолорго көмөнү оҥорор. Бу туһунан Медкиин генеральнай дириэктэрэ Николай Лугинов иһитиннэрбит.
