Сарсыарда 11 чаастааҕы баһылык брифинигэр коронавирус тула балаһыанньаны Айсен Николаев билиһиннэрдэ.
Кулун тутар 31 күнүнээҕи туругунан, Саха сиригэр бигэргэммит коронавирустаах дьон ахсаана уларыйа илик – 15 киһи сутуллубута биллэр. Биир манна оҥоһуллубут биир анаалыс барыллаан “коронавирустаах” диэн көрдөрбүтэ, ону Новосибирскайтан бигэргэтэ иликтэр. Түмүгү сарсыҥҥы күҥҥэ диэри биллэриэхтээхтэр.
Бэҕэһээ маннааҕы доруобуйа харыстабылын министиэристибэтэ уонна Роспотребнадзор 300-тэн тахса анаалыһы оҥорбут. Хата, биир да “положительный” диэн биллибэтэх.
Дьокуускайга (куорат кытыытынааҕы Тулагыга, Киллэмҥэ, Кангаласска, Хатаска, Мархаҕа, Маҕаҥҥа, Табаҕаҕа, Владимировкаҕа, Пригороднайга эмиэ), Жатайга, Мииринэй уонна Нерюнгри оройуоннарыгар муус устар 6 күнүгэр дылы арыгы атыыта кыккыраччы бобуллар. Бу ыйыллыбыт нэһилиэнньэлээх пууннарга бэҕэһээҥҥиттэн дьиэҕэ олоруу усулуобуйата кытаатар. Олох ыксал эрэ буоллаҕына: бородуукта атыылаһарга аттынааҕы маҕаһыыҥҥа, ыты күүлэйдэтэргэ, бөх тоҕорго эрэ таһырдьа тахсыы көҥүллэнэр. Маны таһынан, дьиэттэн кыайан үлэлээбэт тэрилтэ үлэһиттэрэ эрэ сылдьаллар. Дьокуускайга оптуобус сырыыта уларыйда: сарсыарда 7 ч.-10 ч. уонна киэһэ өттүгэр 17-20 ч. сылдьаллар.
