Алмаастаах кыраай киинэ үлэлии-хамсыы олорор. Уулуссаҕа мааскалаах киһи сэдэхтик көстөр. Дөрүн-дөрүн полиция массыыналара көтүтэн ааһаллар. Ааһан иһэр киһиэхэ “харантыын эрэһиимин кэстиҥ” диэн тохтотоллорун көрө иликпин. Билиҥҥитэ оннук. Кэлин туох буолара биллибэт.
Ырыынак, ас маҕаһыыннара, аптекалар урукку курдук үлэлии тураллар. “Сбербаан” филиала муус устар 11 күнүгэр диэри 09.00 чаастан күнүс 16.00 чааска эрэ диэри үлэлиир. Бааҥҥа дьон элбэҕэ суох. Ырыынакка киһи-аймах сарсыарда эрэ өттүгэр аҕыйах. Эбиэт кэннэ киэһэлик дьон толору буолар. Мааскалаах киһи олус аҕыйах. Хаһаанаары ас бөҕөтүн атыылаһаллар. Эрэстэрээннэр, кафелар, остолобуойдар сабыллан тураллар. Арай, итии аһы дьиэҕэ диэри илдьэн биэрии балачча тарҕаммыт. Холобур, “Трэввелерс” кафе ас арааһын дьиэҕэ диэри тиэрдэр.
Муус устар 6 күнүгэр эбиэттэн киэһэ арыгы маҕаһыыннара арылланнар, куоракка холуочук туруктаах сылдьааччы үксээбит. Истигэн, бэрээдэги тутуһааччы өттө дьиэлэригэр ньимиччи олороллор. Тоҕус этээстээх дьиэлэргэ иһигэр бөх кутар сирдээхтэр (мусоросборник). Онон олохтоохтор таһырдьа быкпаттар. Куорат саламтата, үөрэх кыһалара, политехническэй институт, МРТК дистанционнай быһыынан үөрэххэ, “скайпынан” алтыһыыга көспүттэрэ.
Мииринэй аэропуордун саппатылар. Сөмөлүөттэр көппүттэрин курдук көтөллөр. Москубаттан, Новосибирскайтан, Иркутскайтан авиарейсэлэр кэлбиттэрин курдук кэлэ тураллар. Гражданскай авиация ааҕыныстыбалара уруккуларын курдук үлэлиллэр. Дьэ бу сөмөлүөттэр Москуба курдук улахан куораттартан кэлиилэрин, саатар икки нэдиэлэҕэ тохтотуохха баара.
Бүгүҥҥү күннээҕи туругунан Мииринэйгэ, Айхалга уонна Удачнайга обсерватордар аһыллан, ханнык баҕарар түгэҥҥэ бэлэмнэр. Саамай элбэх үлэлээх уонна түбүктээх дьонунан Мииринэй балыыһатын эмчиттэрэ, Дьокуускайтан кэлбит эмчит-устудьуоннар, “Роспотребнадзор”, “Санэпидназор” үлэһиттэрэ уонна волонтердар буолаллар. Кылгастык балаһыанньаны быһаардахха итинник.
Станислав Алексеев. Мииринэй куората.
