Ил Дархан Айсен Николаев бүгүҥҥү брифиҥҥэ Нидерландыттан кэлбит дьахтар анаалыһын, дьиэҕэ олорон үөрэнии бастакы күнэ хайдах ааспытын, “самоизоляцияны” кэтээн көрүүтүн туһунан иһитиннэрдэ.
– Хоруона-вируһунан ыалдьыбыт дьон ахсаана уларыйбата. Нидерландыттан кэлбит дьахтар анаалыһа Новосибирскай куоракка чинчийиллэр. Билигин балыыһаҕа аҕыс киһи сытар. Ааспыт күн биир киһи үтүөрэн тахсыбыта. Бу нэдиэлэҕэ эмиэ тахсалларын күүтэбит.
– Бэҕэһээ өрөспүүбүлүкэ үрдүнэн дистанционнай үөрэх бастакы күнэ ааста. Уопсайа 132 тыһ тахса оҕо үөрэннэ. Ол да буоллар кэккэ кыһалҕалар бааллар: уот барыыта, интэриниэт быстыыта. Ол эрэн, бастакы уопут ситиһиилээхтик ааста дии саныыбын. Интэриниэтэ суох ыраах сытар нэһилиэнньэлээх пууннарга , социальнай дистанцирования нуормат ын тутуһан 12 киһилээх бөлөхтөрүнэн үөрэх барда.
– Бүгүн атын эрэгийиэннэртэн кэлбит рейсэлэртэн үрдүк температуралаах сэттэ киһини балыыһаҕа киллэрдилэр. Кинилэртэн анаалыс ылыахтара. Маннык түгэн күн аайы буолар.
– Атын дойдулартан кэлбит сорох дьон “самоизоляция” эрэһиимин тутуспаттар. Кинилэри аныгы систиэмэнэн кэтээн көрөбүт. Ону таһынан, суотабай төлөпүөнүнэн эмиэ. Бу дьон доруобайдар диир кыахпыт суох.
– Дьокуускайга араас тэрилтэлэргэ, уопсастыбаннай тыраанспардарга уонна уулуссаларга дьон сылдьара элбээбит. Бу олох табыллыбат. Саха сиригэр хоруона-вируһа суох буолла диир кыахпыт суох. Атын эрэгийиэннэртэн ыалдьыбыт дьон кэлиитэ бэлиэтэнэ туруоҕа.
– Аҕа саастаах дьон таһырдьа тахсан бэйэлэрин улахан кутталга уган биэрэллэр.
– Доруобай буолуҥ, “самоизоляция” эрэһиимин тутуһуҥ!