Бу кутталы дьалбарытар туһааннаах миэрэлэр наадалар. Бастатан туран, кылгас да кэмҥэ Арассыыйа бөдөҥ куораттарыттан Мииринэйгэ диэри авиарейсэлэри тохтотуохха наада этэ. Тоҕо диэтэххэ, Мииринэй кэлии-барыы дойдута. Аҥаардас биир сыл иһигэр Мииринэй аэропордуттан 300-тэн тахса тыһыынча киһи көтөр. Ленскэй оройуонун олохтоохторо эмиэ биһиги аэропорпут нөҥүө көтөллөр.
Муус устар 5 күнүгэр коронавируһунан ыалдьыбыт Ленскэй куорат олохтоохторо, кэргэнниилэр, Мииринэйгэ кэлээт дойдуларгар таксыынан барбыттар. Бу сылдьан Мииринэй дьонун сутуйан ааһыахтарын сөп этэ. Хата, алтыспыт дьону тута быһааран, биир киһини обсерваторга, сорохторун дьиэлэригэр 14 күн олордо ыыттылар. Даҕатан эттэххэ, Мииринэй куоратыгар икки обсерватор баар. “Горняк” профилакторийга уонна наркология балыыһатыгар. Аҕыйах күн буолаат, Мииринэй оройуонун кытта сэргэ сытар Чайыҥдатааҕы ньиэп-гаас хостонор сиригэр, “Сила Сибири” утум киинигэр “ГазпромдобычаНоябрьск” хампаанньа баахтатын сэттэ оробуочайа коронавируһунан ыалдьыбыттара улаханнык сэрэхэдиттэ. Чайыҥдаттан Таалакаан аэропордугар( 150 биэрэстэ) оптуобуһунан айаннаан тиийэн атын куораттарга көтөллөр. Бу ыалдьыбыт дьон “Таалакаан-Ноябрьскай” хайысханан, “Газпром” сөмөлүөтүнэн көппүттэрэ. Онон, Чайыҥдаҕа туох эмэ буоллаҕына, Мииринэйинэн соҕуруу көппөттөр. Ол да буоллар, “Газпром” биэс лиссиэнсийэлээх учаастага Мииринэй уонна Сунтаар оройуоннарыгар бааллар. Ону учуоттуур оруннаах. Бу сүүнэ хампаанньа баахтатын оробуочайдара биһиэхэ эмиэ бааллар. Балар кэлиилэрин-барыыларын ким да хонтуруоллаабат. Кинилэр кимиэхэ да отчуоттаабаттар, Саха сиригэр нолуок да төлөөбөттөр. Ол эрэн, ордук чуолаан “ГазпромТомскТранснефть”, “ГазпромКраснодар”, “Газпромбурение”, “Газпромгеологоразведка” хампаанньалар дьоно Мииринэй аэропордугар кэлэллэр. Кинилэр эрэ буолуо дуо, “Роснефть”, “РНГ” курдук улахан хампаанньалар үлэһиттэрэ айанныыллар. Итинэн холобурдаатахха, билигин “Сovid-19” дьаҥ ордук сытыырхайан турар сирдэриттэн, ньиэп-гаас дьоно ордук хото, элбэхтик кэлэллэр. Балар кэлиилэрин-барыыларын кытаанахтык хааччахтыыр кыах, боломуочуйа үрдүкү салалтаҕа бэриллэрэ ирдэнэр. Мииринэй, Ленскэй оройуоннарын олохтоохторо, баахта оробуочайдара бу дьаҥы соҕурууттан аҕалыахтарын сөп диэн сэрэхэдийэрбит оруннаах.
Станислав Алексеев, Мииринэй куората. Ааптар хаартыската.
