Бүгүҥҥү туругунан өрөспүүбүлүкэҕэ Бүлүүгэ, Мииринэйгэ, Дьокуускайга уонна Алдаҥҥа коронаврустаабыт киһи булулунна. Бу туһунан Ил Дархан сарсыардааҥҥы брифинигэр иһитиннэрдэ.
— Хомойуох иһин, Мииринэй улууһугар эмиэ биир киһи коронавирустаабыта бигэргэннэ. Ыарыһах Москуба уобалаһыгар соторутааҕыта эмтэнэн кэлбит, кэлэн баран төрөппүттэрин кытары изоляцияҕа олорбут. Москубаҕа сылдьан сыстыбыта билиннэ, билигин аҕатын кытары балыыһаҕа киирдилэр. Аҕатыттан анаалыһы ыллылар. Дьокуускайга балаһыанньа ыарахан. Аэропорт үлэһитэ ыалдьыбыт, кинини суһаллык обсерваторга укпуттара, анаалыһа коронавирустаах диэн көрдөрдө. Дьааҥы улууһуттан манна эмтэнэ кэлбит дьахтар Мархатааҕы ыаллара - 3 киһи ыалдьыбыта билиннэ уонна биир куорат тэрилтэтин үлэһитэ сыстыбыта бигэргэннэ. Алдаҥҥа даҕаны балаһыанньа тупсан испэт. Күн ахсын саҥа ыарыһаҕы булаллар. Суукка иһигэр 4 киһи ыалдьыбыта билиннэ: ырыынакка үлэлээбит кэргэнниилэр алтыспыт дьоно уонна олохтоох балыыһа санитарката. Ол санитарка Кисловодскайтан кэлбит дьахтартан сыстыбыт буолуон сөп диэн сабаҕалыыбыт. Арааһа, оҕоттон сыстыбыт буолуон сөп, тоҕо диэтэххэ, кинилэр оҕо былаһааккатыгар бииргэ оонньообуттар. Онон төрөппүттэр оҕолор таһырдьа оонньуулларын бобуохтарын наада. Бу түбэлтэлэр изоляцияны хайаан да тутуһуллуотаах диэн өссө төгүл бигэргэтэр. Ленскэй улууһугар Чайаҥдатааҕы ньиэп-гаас баайдаах сиргэ бөлүүн карантины биллэрдибит. Онно Газпрому кытары тыһыынчанан киһини анаалыстаан бэрэбиэркэлиэхпит. Инньэ гынан, билигин Саха сиригэр коронаврустаабыт киһи ахсаана 47-ҕэ тиийдэ, олортон 15 киһи үтүөрбүт.
