Айсен Николаев муус устар 20 күнүгэр сарсыарда 11 ч. туругунан коронавирус тула балаһыанньаны иһитиннэрдэ.
-- Коронавирус Саха сиригэр кэлиэҕиттэн уопсайа 111 ыарыһах бигэргэммит. Онтон 16 ыарыһах үтүөрбүт. Өрөбүллэргэ ыарыһах ахсаана биллэ улаатта: 23 ыарыһах - Чайыҥдатааҕы ньиэп-гаас баайдах сиргэ бэлиэтэнэр, олортон 11 киһи Ленскэйгэ эмтэнэр. Саха сирин балыыһаларыгар 72 киһи эмтэнэ сытар: 41 – Алдаҥҥа, 22 - Дьокуускайга. Хоту улуустан кэлбит ыарыһах дьахтар ыарахан туруктаах сытар, ИВЛ аппараатыгар холбонно. Кини Мархаҕа алтыспыт дьонуттан – 7 киһи анаалыһа “коронавирустаах” диэн буолла. Ол иһигэр Перинатальнай киин үлэһитэ. Онон балыыһаны ыам ыйын 3 күнүгэр дылы саптылар,төрүүр дьахталлары Медкииҥҥэ ыытыахтара.Оттон эрдэ киирбит дьахталлары “Чэбдик” сонотуоруйга гинекология куойкаларын арыйан утаардылар. Балыыһаҕа дезинфекция ыытыллар, алтыспыт дьонтон анаалыстары ылаллар. Төһө эмэ “дьиэҕэ олоруҥ” диэн этиллэрин үрдүнэн, дьон изоляцияны тутуспат. Мархатааҕы түбэлтэ өссө төгүл изоляцияны күүскэ тутуһуллуохтааҕын бигэргэтэр. Ол эрээри дьон тутуспат. Анаалыстары ылыы биллэ улаатта. Өрөбүллэргэ Алдаҥҥа 100-чэ ылыллыбыт анаалыстар биир киһиттэн ураты бары “отрицательнайдар” диэн. Алдаҥҥа хонтуруолу туттубут. Чайыҥдаҕа күүстээх үлэ ыытылынна. Бүгүн Санкт Петербургтан эмп-томп уонна СОГАЗ хампаанньа эмчиттэрин тиэммит сөмөлүөт кэлиэҕэ. Дьокуускайга дьон изоляцияны тутуһуутун кытаанахтык хонтуруоллуохпутун наада.
