Кутана сэлиэнньэтиттэн икки биэрэстэ чугас сытар Саһар үрэҕин күргэтин өрөмүөннүүр, “ВССМ” диэн “РНГ” хампаанньа тэрилтэтин баахтабай бөһүөлэгэ баар. Айан суолуттан богуончуктара субу көстөн тураллар.
Муус устар 18 күнүгэр бу тэрилтэ икки оробуочайа коронавируһунан ыалдьыбыттара бэлиэтэннэ. Мантан сылтаан Роспотребнадзор дьаһалынан, Сунтаар улууһугар атын эрэгийиэннэртэн уонна дойдулартан кэлбит дьону бэрэбиэркэлииргэ күһэлиннилэр. Холобур, сэлиэнньэҕэ таас тутуунан дьарыктанар уонна уулуссалар бүрүөһүннэрин оҥорор Арменияттан сылдьар дьон, “Кинг-95” тэрилтэ үлэһиттэрэ инфекционнай салааҕа бэрэбиэркэни бардылар. Даҕатан эттэххэ, “Кинг-95” Мииринэй куоратыгар эмиэ үлэлиир. Билигин Бүлүү өрүскэ массыына сырыыта бобуллан, Сунтаар улууһа эмиэ бүтэйдэ, кэлии-барыы тохтоото. Арай, бөртөлүөттээх ньиэп-гаас тэрилтэлэрэ эрэ, бэйэлэрэ билэллэринэн сылдьаллар. Кинилэр сылдьар эбийиэктэрэ ыраах тыаҕа, Өлүөхүмэ уонна Ленскэй оройуоннарын быыстаргар бааллар.
Станислав Алексеев. Мииринэй куората.
