Быйыл Орто Халыма Березовкатыгар 5 иккилии кыбартыыралаах олорор дьиэлэри тутан киллэриэхтэрэ. Бу туһунан улуус дьаһалтатын пресс-сулууспата иһитиннэрэр.
Улуус баһылыга Евгений Слепцов бу күннэргэ Березовкаҕа тиийэн уу ылар сирдэриттэн дьиэлэри көһөрүү хайдах барарын билистэ.
“Быйыл Березовкаҕа оскуола өрөмүөннэниэҕэ, саҥа хочуолунай тутуута саҕаланыаҕа, итиэннэ олорор дьиэлэри тутуу салгыы ыытыллыаҕа. Маны таһынан, инфраструктураны тупсарыы, массыына суолун тутуу уонна саҥа ФАП тутуута түмүктэниэҕэ. 2021 сылга элбэх функциялаах киин тутуутун саҕалыыры былаанныыбыт”, - диэн Евгений Слепцов кэпсээбит.
Улуус баһылыга бэлиэтээбитинэн, быйыл Арҕахтаахха 80 миэстэлээх оскуола тутуута салҕаныаҕа. Орто Халыма куоратыгар успуорт комплексын тутуута түмүктэниэхтээх, “Гражданнары хаарбах дьиэттэн көһөрүү” бырагыраама иитинэн элбэх кыбартыыралаах олорор дьиэ тутуута саҕаланыахтаах. Маны таһынан, “Дороги Арктики” КП Орто Халыматааҕы учаастагар баһаарынай депо уонна суолу өрөмүөннүүр пуун эбийиэктэрэ тутуллан бүтүөхтэрэ.
