Бу күннэргэ Тыа хаһаайыстыбатын министиэристибэтигэр “итии-буһуу” күннэр тураллар. Ол эбэтэр, “Саҥа саҕалааччы бааһынай” федеральнай бырагырааматыгар хапсан, көмө үбү ылар туһугар саҥа саҕалааччылар куонкуруска киллэрбит бырайыактарын көмүскүүр тэрээһиннэрэ саҕаламмыта. Былырыын куонкуруһу ситиһиилээхтик ааспыт 66 бааһынай итинник граҥҥа тиксибитэ.
Быйыл куонкуруска 275 сайаапка киирбититтэн, бырайыагы көмүскүүр түһүмэххэ 260 бааһынай хаһаайыстыба тахсыбыт.
2018 сылга бу граҥҥа уопсайа 174 мөл. солк. көрүллүбүтүт, ол иһигэр өрөспүүбүүлүкэттэн көрүллэр кыттыгас үбүлээһин кээмэйэ – 14 мөл. солк.
Куонкурус хамыыһыйатыгар тустаах министиэристибэ, уопсастыбаннай тэрилтэлэр, уопсастыбаннас бэрэстэбиитэллэрэ баалларын иһитиннэрэллэр. Кытааччы элбэх буолан, бырайыак көмүскээһинэ үс күҥҥэ былааннаммыта. Бүгүн – тиһэх күн. Онон кимнээх өйөбүл үпкэ тиксибиттэрин билэрбит аҕыйах кэм хаалла.
