Ыам ыйын 3 күнүгэр Сунтаардааҕы балыыһа эмчиттэрэ Бүлүү өрүс уҥуор тахсан, Куттана аттынааҕы “РНГ” баахта бөһүөлэгин 42 уонна 19 олохтоох дьон доруобуйаларын көрдүлэр.
Инники анаалыстар түмүктэринэн, “РНГ” 12 оробуочайа хоруона вируһунан ыалдьыбыта бигэргэнэн Сунтаарга суһаллык аҕаллылар. Бүлүү өрүскэ муус бараары турар кыдьымах буолан, “хивус” эрэһиинэ суудунанан туораатылар. Онон Сунтаар балыыһатыгар сытар “РНГ” оробуочайын ахсаана 22 буолла. Ыарыһахтар элбээн инфекчионнай салааны таһынан терапия салаатыгар киллэрдилэр. Оттон Кутана сэлиэнньэтин 19 олохтооҕун анаалыһыттан туох да дьиэги булбатылар. Манан уоскуйар сатаммат. Баахта үлэһиттэрэ өссө хас киһини кытта алтыспыттара биллибэт. Ону сыныйан быһаараллар, чуолкайдыыллар. Балаһыанньа аны хайдах буолан туруо дьэҥкэтэ суох. Билигин Саһар үрэҕэр баар баахта бөһүөлэгэр отучча оробуочай богуончуктарыгар сыталлар. Манна шлагбаум туруорбуттара. Полиция үлэһиттэрэ кэтээн көрүүнү ыыталлар. Кутана сэлиэнньэтин ыксатыгар эмиэ шлагбаум баар. Дьон сырыыта хааччахтанан олус эрэйдэннилэр.
Станислав Алексеев, Мииринэй куората.
