Быйыл ньиргиэрдээхтик ылыллыахтаах Улуу Кыайыы 75 сыллаах бырааһынньыга, үөйбэтэх өттүбүтүттэн ааҥнаан кэлбит дьаҥынан сибээстээн, көһөн биэрдэ. Бу сыллар тухары хаһан даҕаны буолбатах ураты форматка ыам ыйын 9 күнүн бэлиэтиэхпит, биһиги ытыктыыр Бэтэрээннэрбитин чиэстиэхпит.
Быйылгыттан саҕалаан Ньурбатааҕы ыччат политикатын салаата Улуу Кыайыы 75 сылыгар анаан «Воины Победы» диэн төгүрүк сыл тахсар биэрии циклын оҥорон таһаарар. Ньурба улууһуттан барыта уоттаах сэриигэ 2697 саллаат ыҥырыллан барбытыттан сэрии хонуутугар 1600 буойун көмүс уҥуохтара хаалбыта, 1000 кэриҥэ саллаат тыыннаах дойдуларыгар эргиллэн кэлбиттэрэ.
Кинилэр хорсун быһыыларын ахтан-санаан туран бу циклга барыта 15 саллаат устуоруйата дьоҥҥо тиийимтиэ гына кылгастык, ол эрэн ис хоһоону биэрэр гына киирдэ. Билиҥҥи туругунан 8 биэрии цикла таҕыста, салҕыы 7 оҥоһуллан тахсыа. Ол курдук, аччыктааһыны бохсубут колхуос бэрэссэдээтэлэ Ион Егоров – Уһун Дьуона Мэҥэдьэккэ сэрии кэмигэр ыалы барытын кэрийэ сылдьан аччыктаан эрэр ыалга колхуостан бурдук бэрсэн, хас биирдии киһини ааҕа билэн, этэҥҥэ сэрии ыар кэмин туоруурга сүдү кылааттаах. Өҥөлдьөттөн төрүттээх учуутал идэлээх буойун-поэт Алексей Софронов уоттаах сэриигэ Украина анныгар дойдутун туһугар хорсуннук охтубут биир дойдулаахпыт. Эстонияны босхолуур иһин киирсибит Антоновка хорсун саллаата Илья Теленков дойдутугар өҥөтө, онтон да атын болҕомтону эрэйэр цикллары “Бэрт Кут” диэн Ньурбатааҕы ыччат политикатын анал ютуб ханаалыгар киирэн көрүөххутун сөп.
Кэнники манан түмүктээн кэбиспэккэ, колхуоска үлэлээбит хоһуун үлэһиттэри, Үлэ дьоруойдарын онтон да атын бастыҥ дьону үйэтитэр былааннаахтар.
“Суруллубут суоруллубат” дииллэринии ким тугу сатыырынан, кыра да буоллар Улуу кыайыы устуоруйатыгар кылаат киллэрэрбит биһиги ытык иэспит.
Лена Петрова
