Бүлүү өрүс мууһа хаайар, Оччугуй Ботуобуйаҕа халаан кэмигэр Мииринэй уонна Сунтаар оройуоннарын икки ардыларыгар, сырыы-айан өргө диэри хааччахтанар.
Сунтаартан Мииринэйгэ, Айхал ХБК-гар аналлаах цеолит, ньиэп үлэһиттэрин геологическай уонна хостуур скважиналарыгар Кэмпэндээйи тууһун тиэллиитэ тохтуур. Маны сэргэ ыаллыы улуустан үрүҥ ас кэлэрэ хааччахтанар. Уопсайынан, икки ыаллыы улуус “муора арыыларыгар” олорор курдук буолан хаалабыт. “Бүлүү” федеральнай суолун 1.151-с көһүгэр, МУАД (Новай) уонна Кириэстээх икки ардыларыгар, бу күннэргэ Оччугуй Ботуобуйа күргэтэ тутулла турар. Эбийиэги кэмигэр киллэрээри үлэлии ахан сылдьаллар. Түүннэри уоттара-күөстэрэ сандааран олорор. Муоста үрэҕи туора түспүтэ. Аны сайын күргэ үрүтүн аспаалынан бүрүйүөхтэрин уонна тутулун, тулааһынын бөҕөргөтүөхтэрин, үрэххэ киирэр суоллары тутуохтарын наада. Алтынньы ый бүтүүтүгэр Оччугуй Ботуобуйа күргэтэ бэлэм буолуо диэн бэдэрээччит “ВССМ” ХЭТ эрэннэрбитэ ыраатта. Дьэ, аны элбэх мучумааннаах буомунан, Бүлүү өрүһү Кириэстээх аннынан туорааһын буолар. Манна өрүһү туоруур күргэ бу кэмнэргэ тутуллар кэскилин торумнуу иликтэр. Чопчу былаан баарын илэ харахпынан көрбөтөҕүм. Онон, Кириэстээх аннынан Бүлүү өрүс күргэтэ хаhан тутулларыгар ким да саараабат, “тымтыктана” да соруммат. Оттон манна күргэ олус наада!
Бу туһугар “Бүлүү” федеральнай суолун саламтатын уонна “Росавтодор” икки ардыларыгар, биир санаанан үлэлээhин ирдэнэр. Кириэстээх аннынан Бүлүү өрүс киэҥэ суох, 500-чэ миэтэрэ курдук. Муостаны тутар кыах баар. Холобурдаан эттэххэ, Чернышевскайтан чугас Бүлүү ГЭС быһытын кыйа, 380 миэтэрэ уһуннаах күргэни икки сылга тиийбэт кэмҥэ дьэндэппиттэрэ. Оннук тэтиминэн Бүлүү өрүскэ, Кириэстээх аннынан муоста тутар тоҕо сатамматый?
Бүлүү өрүһү Кириэстээҕинэн туоруур күргэ тутуллуутун туhунан, Өрөспүүбүлүкэ бырабыыталыстыбатын отчуотугар эбиитин Интэриниэккэ, хаһыаттарга, араадьыйанан-тэлэбиидьийэнэн ким да эппэт-тыыммат. Бэл, олохтоохтортон сэдэх этии киирээччи. Улахаҥҥа холооботторо көстөр. Манан сылыктаатахха, Саха сирин үрдүкү саламтатыттан дьаһала, ыйыыта суох сүдү дьыала оннун булара саарбах. Бүлүү өрүһү Кириэстээҕинэн туоруур күргэ тутуллара буоллар, дьон олоҕо сүрдээҕин сэргэхсийиэ, бырамыысалынаска, тыа хаһаайыстыбатыгар да сүрдэҕин туһалаах буолуо этэ.
Тыа хаһаайыстыбатын чопчу ылан көрдөххө, Саха сирин тыатын хаһаайыстыбатын биир бөдөҥ тэрилтэтэ “Кириэстээх” ТХКП ынах сүөһүтүн, сылгытын Бүлүү өрүс уҥуор сытар Сэрии Киирбит, Түбэ сыһыыларыгар хаҥас кытылтан быдан киэҥ, иҥэмтэлээх оттоох сирдэргэ иитэрэ судургутуйуо этэ. Манна сыhыаран Устьенан, Күндээдэнэн, Бүлүү Эбэ Хотуну туоруур күргэлэри туталлара буоллар, дьон федеральнай суол устун Дьокуускай диэки туох да эрэйэ суох тигинэччи айанныа этилэр.
Станислав Алексеев, Мииринэй куората.
