Ыам ыйын 4 күнүгэр “Саха сиринээҕи быыһыыр сулууспа” Орто Халыматааҕы көрдүүр-быыһыыр этэрээтигэр, муус устар 12 күнүгэр Дьокуускай куораттан Орто Халыма улууһун Андрюшкино нэһилиэгэр биэс киһи икки массыынанан айаннаабытын туһунан иһитиннэрии киирбит. Сибээскэ ыам ыйын 1 күнүгэр тахсан, Үөһээ Дьааҥы улууһун Арыылаах нэһилиэгиттэн айаҥҥа туруммуттарын туһунан иһитиннэрбиттэр. Ол кэнниттэн сибээскэ тахсыбатахтар.
Орто Халыматааҕы көрдүүр-быыһыыр этэрээт начаалынньыга Алексей Тарасов салайааччылаах бөлөх, буранынан сүппүт дьону көрдөөбүттэр да булбатахтар. Ол иһин бөртөлүөтүнэн көрдүүргэ быһаарыммыттар.
Ыам ыйын 6 күнүгэр көрдүүр бөлөххө ИДьМ үлэһитэ, оройуоннааҕы ГОЧС бэрэстэбиитэлэ уонна десентник быыһааччылар киирбиттэр.
Орто Халыма уонна Үөһээ Дьааҥы улуустарын кыраныыссатыттан 20 км тэйиччи УАЗ массыынаны булбуттар. Ол таһыгар иккис массыына суола көстүбүт. Онтон 11.30 чааска хаалларбыт массыыналарыттан 35 км тэйиччи ГАЗ 66 массыынаны уонна дьону булбуттар.
Алексей Тарасов иһитиннэрбитинэн, алта эдэр эр дьону булбуттар. Кинилэр доруобуйаларын туруга үчүгэй. Аһыыр астара эҥин баар эбит. Массыыналарын алдьаммыттарын иһин хаалларбыттар. Эр дьону Орто Халыма куоратыгар аҕалбыттар.
