Бу туһунан “Алмаастаах кыраай” теле-радио хампаанньа биллэрдэ. Мииринэйтэн 220 көс ыраах сытар Чайыҥда үс үлэһитин бастакы анаалыстарын түмүгэ, хоруона вируһугар туох да дьиэги көрдөрбөтө.
Оттон биир үлэһит анаалыһа кини ыалдьыбытын ырылыччы көрдөрдө. Үлэһиттэри кэлэр тургутааһын кинилэр дьиҥ туруктарын бигэргэтиэ. Бу кэмҥэ диэри Мииринэй инфекционнай балыыһатыгар, Москуба уобалаһыттан кэлбит биир эдэр киһи, соҕотох ыалдьыбыт киһинэн ааҕыллара. Мииринэйгэ соҕурууттан дьон кэлиитэ элбэх. Ол курдук хоруона вирус дьаҥа сытыырхайбыт, Москуба, Санкт-Петербург курдук куораттартан дьон кэлэ тураллар. Көтөн кэлбит дьон туруктарын дистанционнай тестердэринэн бэрэбиэркэлииллэр. Күөмэйдэриттэн, муруннарын сарыытыттан мазок ылаллар. Айанньыттар аэробаксаалга киирээттэрин кытта, Роспотребнадзор Мииринэйдээҕи салаатын аналлаах докумуонун толоттороллор. Бу дьон Мииринэй олохтоохторо буолбатах буоллахтарына, булгуччу икки нэдиэлэ устата обсерваторга сытыахтаахтар. Аҕыйах хонуктааҕыта 70-ча киһилээх икки обсерватор балтараа сүүскэ диэри элбээбитэ. Санатан эттэххэ, Мииринэй куоратыгар биир обсерватор “Горняк” профилакторийга, иккис наркология балыыһатыгар бааллар. Баччааҥҥа диэри нус-хас олорбут Мииринэй куората, хааччахтааһыннар күөннэригэр олорор. Атын куораттартан дьон ааллаан кэлэ тураллар. Ол иһигэр, барыта чэгиэн дьон кэлиэхтэрэ диэн мэктиэ суох. Кылгас да кэмҥэ соҕурууттан сөмөлүөттэр кэлиилэрин хааччахтыы да сорумматылар. Онон, куораппытыгар инникитин балаһыанньа хайдах диэлийэн туруо биллибэт.
Станислав Алексеев, Мииринэй куората.
