Бүгүн Ньурба улууһугар бэрт долгутуулаах уонна үөрүүлээх түгэн буолла! Ол курдук, 17 эдэр ыалга дьиэ тутталларыгар уонна олорор усулуобуйаларын тупсаралларыгар диэн ортотунан 1.000.000 солк. суумалаах сэртипикээттэри туттардылар.
Буола турар быһыыны-майгыны учуоттаан видео сибээс нөҥүө улуус баһылыга Алексей Иннокентьев дьоллоох дьиэ кэргэттэри сааскы бырааһынньыктарынан эҕэрдэлээтэ, харыстана сылдьалларыгар сүбэлээтэ, итиэннэ үөрүүлээх быһыыга-майгыга сэртипикээттэри туттарда.
Эдэр ыаллар улуус дьаһалтатыгар, күүс-көмө, сүбэ-ама буолбут исписэлиистэргэ ис сүрэхтэриттэн махтаннылар.
Лена, Николай Павловтар:
– Биһиги Түмүк нэһилиэгэр үлэлии сылдьан 2013 сыллаахха уочаракка турбуппут. Бу субсидияҕа тиксибиппититтэн олус үөрдүбүт. Биһиги уһуйааҥҥа иитээччинэн уонна ОДьКХ суоппарынан үлэлиибит. Кыыс оҕолоохпут – уһуйаан иитиллээччитэ. Биһиги чааһынай дьиэ туттар былааннаахпыт, онно оруобуна анаабыт курдук олус табыгастаах көмө буолла. Ньурбабыт баһылыга Алексей Михайлович эдэр ыаллары, уопсайынан, эдэр дьону куруук өйүүр. Түгэнинэн туһанан, биһиги дьиэ кэргэн аатыттан улахан махталбытын тиэрдэбит.
Сэртипикээккэ тиксибит 17 ыал 2012-2013 сс. уочаракка туран, туһааннаах докумуоннарын кэмигэр туттаран, күүтүүлээх түгэннэрэ дьэ тосхойдо.
Бу сыалга оройуон бүддьүөтүттэн 10 мөл солк тахса, өрөспүүлүкэттэн 600 тыһ солк тахса, федеральнай үптэн 7 мөл солк кэриҥэ, барыта холбоон 18 мөл солк тахса көрүллэн, 17 эдэр ыал үөрүүлэрэ муҥура суох. Бу сэртипикээттэри эдэр ыал өрөспүүбүлүкэ хайа баҕар сиригэр-уотугар туһаныахтарын сөп.
