“РНГ” хампаанньа “ВССМ” тэрилтэтин 22 оробуочайа Сovid-19 хабараан ыарыылаах Сунтаар балыыһатыгар сыталлар. Итинтэн сэдиптээн ыам ыйын 12 күнүн кэнниттэн, дойду үрдүнэн хааччахтааһын, харантыын кыратык мүлүрүтүллэр кыахтаах буоллаҕына, бу улууска ол көрүллүбэт чинчилээх.
Бүгүн, Ил Дархан А.Николаев “Якутия24” ханаалга брифиҥҥэ, Сунтаар балыыһатыгар биир баахта үлэһитэ үтүөрбүтүн бигэргэттэ. Атыттар туруктара улаханнык уларыйа илик. Кутана сэлиэнньэтин аттынааҕы баахта бөһүөлэгэр, богуончуктарга олорор отучча оробуочай туруктара эмиэ тугунан дьайыа, диэлийиэ биллибэт. Аны бу дьону кытта алтыспыт олохтоох дьон доруобуйалара долгутар.
22 баахта үлэһитэ Сунтаар балыыһатын инфекционнай уонна терапевтическай салааларыгар сыталлар. Кинилэри олохтоох эмчиттэр сүрдээҕин кичэйэн, кыһаллан-мүһэллэн көрөллөр. Тотоойутук аһаталлар. Дьэ, бу атын уобаласка, соҕуруу пропискалаах дьону, төрүт олохтоох ыарыһах элбэҕин үрдүнэн көрө-истэ сылдьаллар. “РНГ” бас-көс хампаанньа Сунтаар эмчиттэригэр маннык тыҥааһыннаах усулуобуйаҕа тугунан эмэ көмөлөстө дуо? Мин Сунтаар балыыһатыгар эрийэммин, туһааннаах хоруйу истибэтим. Оттон хоруона вируһугар дьиэктэрэ булуллубатах дьону, хампаанньалара тоҕо соҕуруу ыыппата? Баахта үлэһиттэриттэн үтүрүллэн, сунтаардар бэйэлэрин балыыһаларыгар эмтэнэр кыахтарыттан маппыттара, соччото суох балаһыанньаны үөскэттэ. Маны Өрөспүүбүлүкэҕэ учуоттууллар дуо?
Станислав Алексеев, Мииринэй куората.
Сэҥээриилэр