Ил Дархан Айсен Николаев муус устар 27 күнүттэн Дьокуускайга уопсастыбаннай миэстэлэргэ уонна тырааныспарга мааска эрэсиимин биллэрбитэ.
Бастаан утаа куорат аптекаларыгар тымтыктанан даҕаны мэдэссиинэ мааскаларын кыайан булан ылар кыаҕыҥ суоҕа. Билигин син сорох аптекаларга кыра саппаас баар. Оҕуруктаах өйдөөхтөр, сатабыллаах саҕалаахтар, тарбахтарыгар талааннаахтар “многоразовай” диэн ааттаан, өрбөхтөн мааска тигэн атыылаабыттара. Ортотунан 120-150 солк. этэ, билигин син 60-80 солк. тиийбит. Тоҕо эрэ хара өрбөх сыыһыттан тигиллибит мааска “ходовой” буолбута. Дьиҥэ, маннык маасканы ВОЗ соччо биһирээбэт. Аны туран, 3 чаас буола-буола үчүгэйдик сууйан, өтүүктээн, уларытан иһиллиэхтээх.
Күн-бүгүн куорат аптекаларыгар мэдэссиинэ мааската төһө сыаналааҕый? Биһиги 10 аптекаҕа сылдьан мааска сыанатын ыйыттыбыт.
Онтон 2-гэр мааска номнуо бүппүт. Хаһан атыыга кэлэрин билбэттэр. Оттон Семен Данилов аат. уулусса 3/2 дьиэтигэр баар аптекаҕа “бу күннэргэ кэлэн атыыга тахсыаҕа, тимир суолунан Новосибирскайтан ыыппыттара” дииллэр.
Кальвица 9/1 турар муниципальнай аптекаҕа 1 устуука мааска 38 солк., оттон бэрчээккэ – 22-23 солк. (халыҥыттан, размерыттан көрөн). П.Алексеев аатынан уулуссаҕа турар 109-с №-дээх аптекаҕа мааска эмиэ 38 солк., бэрчээккэ – 23 солк., оттон олох халыҥа – 70 солк., Ленин бэр. 42-гэр турар түүннэри-күнүстэри үлэлиир Дьуһуурунай аптекаҕа мэдэссиинэ мааската суох, арай өрбөхтөн тигиллибит мааска 110 солк. атыыланар. Саамай чэпчэки мааска Дзержинскэй уул. 8-гар баар “Твоя аптека”— 25 солк. атыылыыр. Ол эрээри 100 устуукалаах икки эрэ хаа хаалла диэтилэр. Начаас кэлэн атыыланан бүппүт эбит. Социальнай аптекаҕа эмиэ 25 солк. мааска ити бэрэски курдук атыыланан бүппүт. Бу мааска атын мааскалардааҕар арыый халыҥ, ол эрээри быата начаас быстар диэн кэппит дьон улаханнык биһирээбэттэр. Оттон “Миницен” аптекаҕа мааска отой да 50 солк. атыыланар. Тоҕо оччо сыаналааҕын быһаарбатылар. Уопсайынан, куорат аптекаларыгар мааска ортотунан 38 солк. атыыланар. Онон бу сыананы ылан суоттаан таһаарыаҕыҥ.
Өскөтүн үлэ чааһа 8 чаас буоллаҕына (оттон 1 маасканы 2 чаас буола-буола уларытыллыахтаах), үлэ бириэмэтигэр 4 мааска ирдэнэр. Маныаха үлэттэн дьиэҕэр дылы кэлэ-бара (уопсастыбаннай тырааныспарга, таксыыга, сатыы да тиэстэргэ) ортотунан 1 чаас барар, ол аата эбии биир маасканы кэтэбит. Ол эбэтэр биир күн устата биир киһиэхэ 6 мааска наада. 38 солк. 6 мааскаҕа төгүллээтэхпитинэн – 228 солк. тиксэр. Ол аата, күн иһигэр биир киһи аҥардас мааскаҕа 228 солк. ороскуоттуур. Оттон өрөбүллэргэ маҕаһыыҥҥа, аптекаҕа тахсарга, бөх тоҕорго ортотунан эмиэ 2 мааска наада буолар. 22 үлэ күнүгэр эбии 8 өрөбүл күҥҥэ 148 мааска наада буолар. Ол аата, биир киһиэхэ 5624 солк. мааска атыылаһарыгар наада буолар. Оттон дьиэ кэргэҥҥэ икки үлэһит киһиэхэ 296 мааска ирдэнэр, ол харчытыгар 11248 солк. наада.
Онон бу хааччахтаммыт миэрэлэр кэмнэригэр, ыстырааптаммат уонна хамсыкка хаптарбат туһугар аҥардас мааскаҕа икки үлэһиттээх ыал ортотунан 11248 солк. ыытар. Ону даҕаны хата мааска атыыга баар буолбутугар барҕа махтал курдук.
