Бу хаартыскаҕа көстөрүн курдук, МЦРБ стационара ханан да туора дьон киирбэт, бүтэй сирдэрэ буолан турар. Эбийиэк сабыылаах.
Манна хоруона вирустан эмтиир бүтүн салаа үлэлиир. Уопсайа 51 куойкалаах, ыарахан уонна арыый да ама туруктаахтар сытар салаалара, реаниматология, провизорскай кэтэбил палааталара, иммунология лабораторията баар. Саамай эппиэттээх учаастакка араас омуктартан турар хорсун хоодуот эмчиттэр биригээдэлэрэ, олор истэригэр саха кыргыттара, инфекционист-быраастар Саргылаана Бурнашова уонна Альбина Яковлева үлэлии сылдьаллар.
Күн бүгүн эмчиттэр, Сovid-19 ыарыылара номнуо быһаарыллыбыт, икки өттүлэринэн ойоҕостоппут Чайыҥда баахтатын үлэһиттэрин олохторун иһин охсуһаллар. Бу салааҕа барыта Чайыҥдаттан кэлбит “Газпром” биэс үлэһитэ эмтэнэр. Стационар ыарыһахтары эмтиир усулуобуйанан сөптөөхтүк хааччыллыбыт. Холобур, тыҥаны искусственнай быһыылаахтык үлэлэтэр тэриэбэ (ИВЛ), көмпүүтэр томограба, Владимирскай уобаласка “Генериум” пиирмэтигэр оҥоһуллубут, ыарыыны түргэнник быһаарар аныгы тест оҥорор систиэмэ баар. Онон суостаах ыарыы тэнийэр түгэнигэр, сорунуулаахтык охсуһарга бэлэмнэр. Эмчиттэр тыҥааһыннаах кыраапыкка үлэлииллэр. Биллэн турар, хонор, аһыыр, сынньанар сирдэрэ туспа.
Дьоннорун кытары төлөпүөнүнэн эрэ сибээстэһэллэр. Эмчиттэрэ бэйэлэрин харыстаммат, идэлэригэр бэриниилээх үлэлэрин түмүгэр, хоруона вирус тарҕаныытын 35 000 кэриҥэ киһи олорор куоратыгар кытаанахтык хонтуруолланар. Биһиги оройуоммут элбэх кэлии-барыы дойдута. Хоруона вирус тарҕаммыт сирдэриттэн дьон күргүөмүнэн кэлэ тураллар. Балыыһа эмчиттэрэ кинилэри кыһаллан-мүһэллэн эмтииллэр, анаалыстарын ылаллар, кэтииллэр. “Самоизоляция” диэннэригэр номнуо 700-тэн тахса киһи баар эбит. Ол иһигэр Мииринэйгэ – 300-чэ киһи.
Аҥардас обсерватордарыгар 200-тэн тахса киһи киирдэ. Мин көрдөхпүнэ, куорат олохтоохторо, бу суостаах ыарыы содулун аанньа ахтыбаттар, хоруона вируһун утары охсуһар бэрээдэккэ ээл-дээл сыһыаннаһааччылар элбэхтэр. Дьон таһырдьа талбытынан дьаарбайар. Инфекцияттан харыстыыр бэбээскэтэ суох сылдьаллар. Уулуссаларга массыына толору. Инникитин маннык буолбатаҕына сатанар. Балаһыанньа хаһан баҕарар уустугуруон сөп.
Станислав Алексеев. Мииринэй куората.
