Хоруона хамсыга тарҕамматах хотугу уонна арктика оройуоннарыгар сайыҥҥы лааҕырдар “очно” үлэлиэхтэрэ. Оттон атын муниципальнай тэриллиилэргэ хампаанньа ыраахтан ыытыллыаҕа. Бу туһунан куорат мээрийэтин саайтыгар суруйаллар.
Куорат дьаһалтата иһитиннэрбитинэн, бу күннэргэ видео-сибээһинэн “төгүрүк остуол” ыытыллыбыт. Манна Дьокуускай, Мииринэй, Ленскэй, Нерюнгри, Жатай, Айхал, ону таһынан, Амма, Үөһээ Бүлүү, Бүлүү, Кэбээйи, Нам, Ньурба, Сунтаар, Томпо, Уус Алдан эбии үөрэхтээһин кииннэриттэн уонна үөрэх тэрилтэлэриттэн сүүстэн тахса салайааччы, уһуйааччы кыттыыны ылбыттар.
Тэрээһини “Всероссийская педагогическая собрания” эрэгийиэннээҕи салаатын уопсастыбанньыктара көҕүлээн ыыппыттар.
“СӨ үөрэх уонна наука министиэристибэтин иитии уонна эбии үөрэхтээһин салаатын салайааччы Ольга Яшина, сайыҥҥы хампаанньа икки көрүҥүнэн ыытылларын быһаарда. Ол курдук, хоруона хамсыгынан сибээстээн уустук балаһыанньалаах куораттарга уонна муниципальнай тэриллиилэргэ – ыраахтан. Оттон арктика уонна хоту сытар оройуоннарга – сирэй (очно)”, – диэн иһитиннэриигэ суруллар.
Кыттааччылар хоруона хамсыгын кэмигэр оҕо сынньалаҥын хайдах тэрийэр туһунан санааларын үллэстибиттэр. Улахан аҥаардара “онлайн” формакка көһөллөрүгэр тиийэллэр. Дьокуускайдааҕы үөрэх салалтатын иитэр үлэҕэ начаалынньыгы солбуйааччы Егор Охлопков, эбии үөрэхтээһин тэрилтэлэрэ бэлэмнэрин уонна үөрүйэхтэрин туһунан кэпсээбит. Мунньахха 21 күннээх сынньалаҥы 5-10 күҥҥэ диэри кылгатар туһунан этиини өйөөбүттэр. Бу этиилэри үөрэх уонна наука министиэристибэтигэр ыытыахтара.
Дьокуускайдааҕы 35 №-дээх оскуола дириэктэрэ Лидия Афанасьева этэринэн, билиҥҥи кэмҥэ оҕо доруобуйатын чэбдигирдии туһунан этэр соччо сиэрэ суох. “Оҕо доруобуйатын чэбдигирдии диэн кинилэр ыраас салгыҥҥа, күҥҥэ сылдьаллара буоллаҕа дии. Оскуола төрөппүттэрин кэмитиэтэ 234 төрөппүттэн оҕо сайыҥҥы сынньалаҥын туһунан “онлайн” анкетаҕа хоруйдары ыллылар. Ол түмүгүнэн, 97 төрөппүт оҕолорун дэриэбинэҕэ ыыталлар, 57 төрөппүт – даачаҕа, оттон 60 төрөппүт оҕолоро куоракка хаалаллар. Ону таһынан, 31 төрөппүт “онлайн” лааҕыры сэргээбит, оттон 197 төрөппүт сөбүлээбэтэх, алта киһи бу ыйытыкка хоруйдаабатах”, – диэн Лидия Афанасьева кэпсээтэ.
