Бүгүн, ыам ыйын 21 күнүгэр Арассыыйаҕа Полярник күнүн бэлиэтииллэр. Хотугу эргимтэ уонна Арктика – планета саамай ыраас, икки атахтаах мээнэ үктэммэтэх сирэ. Бу эргин хорсун, дьиҥ айылҕа оҕолоро эрэ тулуйан олороллор.
Саха сирин Арктикатын зонатыгар уопсайа 13 улуус киирсэр, ол иһигэр 4 национальнай, 84 муниципальнай тэриллии, 119 нэһилиэнньэлээх пуун баар.
Саха сирин Арктика зонатыгар бу дьыл муус устарыгар 67.674 киһи олорор (олортон 22% хотугу аҕыйах ахсаан омук бэрэстэбиитэлэ) диэн ыстатыытыка этэр. Таба ахсаана муус устарга 97 101 тэҥнэспит.
Арктика геобэлиитикэ киинигэр сылдьар буолан, дойду интэриэһэ улахан. Билигин Арктика шельфэтин былдьаһыы барар. Ол иһин Арктиканы сайыннарыы, баһылааһын дойду биир улахан бэлиитикэтэ. Маныаха полярниктар бас-көс суолталаахтара өйдөнөр. Оттон полярниктар диэн кимнээҕи ааттыыбытый? Бастатан туран, араас идэлээх, туохтан да чаҕыйан турбат, хорсун санаалаах, туруу үлэһит дьону аатыыбыт. Кинилэр кимиилээх киирсиилэринэн, төрөөбүт дойдуларыгар бэриниилэринэн, ис сүрэхтэриттэн хотугу эргимтэ уонна Арктика сайдыытыгар сүҥкэн суолталаахтар.
Арассыыйа Көлөҕө миниистирэ Евгений Дитрих бу муус устар 10 күнүгэр биһиги ытык дьоммутугар, “Якутская Арктика” полярниктар Ассоциацияларын чилиэннэригэр “Арассыыйа Бочуоттаах полярниктара” үрдүк ааты иҥэрэр туһунан уурааҕы таһаарбыт. Ол курдук, биология билимин дуоктарыгар, ХИФУ бэрэпиэссэригэр, уопсастыбаннай деятель Гаврил Спиридонович Угаровка, чинчийээччи-бэрэпиэссэргэ, АГИИК Циркумполярнай цивилизация билим-чинчийэр киинин салайааччытыгар Ульяна Алексеевна Винокуроваҕа, норуот хаһаайыстыбатын үтүөлээх үлэһитигэр, “Безопасная Арктика” ХЭУо дириэктэригэр Николай Александрович Находкиҥҥа, Булуҥ национальнай нэһилиэк баһылыгар Николай Николаевич Чемезовка, Усуйаана улууһун баһылыгар Георгий Николаевич Федоровка, “Аллайыаха” родовой община салайааччытыгар Сергей Владимирович Бережневка иҥэрилиннэ.
Кинилэргэ бу үрдүк аат иҥэриллибитинэн ис сүрэхпититтэн эҕэрдэлиибит!
