Войти

Войти

900 нэһилиэнньэлээх Кутана сэлиэнньэтигэр чымаан саас ааста диир оруннаах. Ол курдук, Бүлүү федеральнай суолугар сытар, Саһар үрэх күргэтин иккис сылын өрөмүөннүүр “РНГ” ньиэп-гаас хампаанньа самалыга – “Востоксибспецмонтаж (ВССМ)” тэрилтэ үлэһиттэрэ хоруона хамсыгар ылларбыттара.

Ол төрүөтүнэн саас саҕаланыыта, 28 баахта үлэһитэ Мииринэй аэропуордунан Кутанаҕа кэлбиттэрэ буолар. Муус устар 23 күнүгэр баахта үлэһиттэрин бөһүөлэгэр харантыын биллэриллибитэ. Сунтаар улууһун балыыһатын инфекционнай салаатын бырааһа Марианна Егоровна Корнилова салайар эмчиттэрэ, сүрдээх бэриниилээхтик, хорсуннук үлэлээбиттэрин бэлиэтиибин. Кинилэр дьаҥ улаата-кэҥии илигинэ, хоруона хамсыгар хаптарбыт 12, онтон 10 киһини көмүөл саҕана Бүлүү өрүһүнэн туоратан, Сунтаар балыыһатыгар киллэрбиттэрэ. “Сovid-19” сыстыганнаах хамсык сыыйа-баайа 22 баахта үлэһитин сутуйбутун кэннэ, кинилэр сылдьыбыт маҕаһыыннарыгар, алтыспыт дьонноругар кутталы үөскэппитэ. Атыы-эргиэн, чайной, кафе сабыллыбыттара. Эмчиттэр, баахта бөһүөлэгин харабыллыыр полициялар бу ыар хамсыкка сутуллар кутталга, уйуһуйуу балаһыанньатыгар сырыттылар. Хомойуох иһин, “РНГ” хампаанньа доруобай туруктаах 52 киһини Мииринэйгэ илдьэргэ тиэтэйбэтэх. Дьиҥэ, маннык кыахтаах хампаанньа, бөртөлүөтүнэн аҕыйах сырыыны оҥорон, дьонун Сунтаартан таһаарыан сөп эбит.

Онон, хоруона хамсыгын утары киирсэргэ Сунтаар балыыһата эндирдээх балаһыанньаҕа киирэн турар. Балыыһа хоруона хамсыгын иннигэр кыаҕа кыра. Стационарын иккис уочарата да тутулла илик. Бу куорат балыыһата буолбатах. ИВЛ мэдэссиинэ аныгы тэриэбэтэ хааччыллыбыт сирэ буолбатах. Ол эрэн, сунтаардар 22 баахта үлэһитин үтүөрдэр туһугар, туох баар сыраларын уурдулар. Оттон ол эрэйдэрэ, түүннэри-күнүстэри көлөһүннэрин тохпуттара, суостаах балаһыанньаҕа сылдьаллара учуоттанна дуо? “РНГ” хампаанньа Сунтаардааҕы балыыһаҕа, Кутана стационарыгар тугу эмэ күттүөннээҕи көмөлөстө дуо?

Ыам ыйын 8 күнүгэр “РНГ” хампаанньа, Мииринэйдээҕи балыыһаҕа ороҥҥо сыһыары ууруллар, сүрэх тэбиитин, хаан баттааһынын, ыарыһах туругун ырылыччы көрдөрөр, 16 устуука “ВМ-3” диэн Соҕуруу Кэриэйэ монитордарын бэлэхтээбитэ. Бу, биллэн турар, хайҕабыллаах. Оттон Сунтаар эмчиттэригэр, элбэх киһини эмтэтэ, босхо аһата, бүөбэйдэтэ олорон, тугу эмэ дуоннааҕы көмөлөстүлэр дуо? Бу боппуруоска ким да хоруйдаабата. Сунтаар балыыһатыгар биир-икки киһи эрэ буолбакка, 22 киһи эмтэммитэ, отучча киһини кэтээн көрүллүбүтэ элбэх үлэттэн тахсар. Бу – суол-иис суоҕар, хаайтарыы, Бүлүү Эбэҕэ муус халҕаһалыыр кэмигэр. Сунтаардар бэйэлэрин суоттарыгар кутугунайан, баахта үлэһиттэрин эмтээн, үтүөрдэн, “РНГ” хампаанньа дьонун атахтарыгар туруорбуттара. Билигин Сунтаар балыыһатыгар үс ыалдьыбыт лэһит сол да бааллар. Ааспыт нэдиэлэттэн баахта бөһүөлэгэр харантыын эрэсиимэ уурайда. Ааспыт күннэргэ туох баар богуончуктарга дезинфекция үлэтэ ыытылынна. Күн бүгүн Саһар үрэҕэр баар баахта бөһүөлэгэ кураанахсыйда дииллэрэ сымыйа. Үлэһиттэр бааллар. Уоттара-күөстэрэ боруҥуйга сандааран олорор. Тугунан дьарыктаналларын ким да билбэт. Уопсайынан, хамсык турбут сириттэн, баахта үлэһиттэрин тоҕо тутатына көһөрбөтөхтөрө боппуруос. Тоҕо Москуба курдук сиргэ бэрэбиэркэлэммэккэ, ыарыылара тутатына быһаарыллыбакка бачча ыраах кэлбиттэрэ эмиэ атын боппуруос. Бу баахта бөһүөлэгэр эмискэ турбут хоруона хамсыгыттан бүтүн Сунтаар улууһа сутуллар кутталлааҕа. Оннук куттал билигин да намырыы илик. Ким бу маннык күчүмэҕэй балаһыанньаҕа эппиэттиирий? Тоҕо тыа, үрэх баһа дьонун маннык тибилгэҥҥэ, кутталга киллэрдилэр? Кутана дьоно кырдьаҕастыын-эдэрдиин тапталлаах Саһардарын үрэҕэр чугаһаабаттар. Балыктыахтара дуу, кустуохтара дуу? Суох. Аны муус устар ыйга оттук мас кэрдинэллэрэ бобулла сылдьыбыта. Атын бөһүөлэктэргэ сырыыны дьэ саҥа сөргүттүлэр. Ол курдук, хааччахха, эрэйгэ олордулар. Оннук эрэйдэммиттэрэ учуоттаммат, улахан дьыалаҕа ылыллыбат эбит.

kytanagono 

kytana

celenne

caharyrex

rngxontyorata

Станислав Алексеев. Мииринэй куората. Ааптар уонна “АО РНГ. Нефть и газ” саайтан хаартыскалар.

 

Тарҕат:

Комментарии

Tiñsiy
+5 Tiñsiy 25.05.2020 16:34
Jaaby keliiler.
Ответить

Добавить комментарий

Бүтэһик сонуннар