Мииринэйдээҕи инфекционнай балыыһа үлэтэ күн-түүн элбии турар.
Бастакынан, Москуба уобалаһыттан хоруона хамсыгар ыалдьан кэлбит киһини, балачча өр эмтээн, үтүөрдүбүттэрэ. Онтон аны Чайыҥдаттан кэлбит “Газпром” үлэһиттэрин, буолаары буолан, ыарахан туруктаах дьону эмтээтилэр. Олортон биирдэстэрэ бэттэх кэлбэккэ, икки өттүнэн сэбиргэхтэтэн сытар. Соторутааҕыта хоруона хамсыгар хаптарбыттара чопчуламмыт, “РНГ” хампаанньа баахтатын үлэһиттэрэ киирбиттэрэ. “Кыһыл ковиднай зона” ноҕурууската лаппа элбээтэ. Бэҕэһээ ньиэп үлэһиттэрин кытары Ленскэй оройуонугар үлэлээбит Мииринэй олохтооҕун үс оҕото “Сovid-19” ыарыыга анаалыстара бигэргэнэн, госпитальга киирдилэр. Итинэн көрдөххө, хоруона хамсыгар ылларбыт дьон ахсаана, уопсайа 15 киһи буолла.
Станислав Алексеев. Мииринэй куората.
