Саха сиригэр суукка иһигэр 114 саҥа коронавирустаабыт киһи бигэргэннэ, 42 киһи үтүөрдэ. Бу туһунан Айсен Сергеевич бүгүҥҥү брифинигэр кэпсээтэ.
Дьокуускайга 87 киһи ыалдьыбыта билиннэ. 18 киһи - Ленскэйгэ, 3 - Мэҥэ Хаҥаласка, биирдии ыарыһах - Алдаҥҥа, Нерюнгрига, Тааттаҕа, Хаҥаласка, Өлүөхүмэҕэ,Булуҥҥа ыалдьыбыттара бигэргэннэ. Коронавирус аан бастаан Уһук хоту - Булуҥҥа тиийдэ. Ленскэй улууһугар Талакааннааҕы ньиэп-гаас баайдаах сиргэ "Сургутнефтегаз" баахта үлэһиттэрэ ыалдьыбыттар. Билигин онно дьаҥ көрдүгэнин бохсорго былааннаммыт үлэ барар. Киин куораппытыгар ыарыы улахан көрдүгэнэ суох, ыарыһахтар дьиэ кэргэнинэн, билсэр дьонноруттан алтыһыы түмүгэр сыстыһаллар. Ааспыт суукка устата 42 киһи үтүөрбүт, ол иһигэр 39 ыарыһах Дьокуускайга, 1-дии ыарыһах - Ленскэй, Нерюнгри, Хаҥалас улуустарыгар. Хамсык кэмин устатыгар уопсайа 1819 киһи ыалдьыбыт, 790 киһи үтүөрбүт, 8 киһи суорума суолламмыт. Ил Дархан "Дьокуускайга сүүстээх кирбиигэ тиийбэтибит" диэн үөрэн өрө тыынар. Саха сиригэр "самоизоляция эрэһиимэ" бэс ыйын 14 күнүгэр дылы уһуур. Бөдөҥ нэһилиэнньэлээх пууннартан ураты, хааччахтар Нам улууһугар, Мэҥэ Хаҥалас Майатыгар уонна Харатыгар биллэриллэн турар.
Билигин 15 киһи ыарахан туруктаах сытар: 4 ыарыһах - Мииринэйгэ, 11 - Дьокуускайга. 380 киһи туох да биллэр симптома суох ыарыыны аһарынар, кинилэр тастан эмтэнэллэр. Суукка устата өрөспүүбүлүкэ лабораториялара 3206 коронавирус анаалыһын оҥорбуттар, 847 киһи обсерватордарга сытар.
