Войти

Войти

Лоп курдук 70 сыллааҕыта аан дойдуга Оҕо көмүскэлин күнэ бэлиэтэнэр буолбута. Киһи-аймах кэскилин түстүүр, инникигэ эрэлэ – оҕолорбут барахсаттар куруук эйэлээх халлаан анныгар дьоллоохтук олороллорун туһугар хас биирдиибит кыһаныахтаах. Бу бэлиэ күнүнэн Ил Дархан Айсен Николаев эҕэрдэтин тиэрдэр.

Ытыктабыллаах Саха сирин олохтоохторо!

Биһиги бүгүн саамай сырдык уонна үтүө бырааһынньыгы – Оҕо көмүскэлин күнүн бэлиэтиибит! Бу күн – хас биирдии киһиэхэ баар саамай күндү, хас биирдии дьиэ кэргэн инникигэ эрэлэ, өһүөтэ буолар, дойду кэскилин түстүүр – оҕолорбут барахсаттар бэлиэ күннэрэ. Бу күнү оҕолор араас эйгэҕэ ситиһиилэри дабайалларыгар күүс-көмө буолар төрөппүттэр эмиэ үөрүүнү кытары бэлиэтииллэр.

Күн бүгүн Саха сиригэр 286 тыһ. тахса оҕо олорор. Бу балысханнык уларыйа турар олоххо кинилэр дьылҕаларын, доруобуйаларын туһугар бары улахан эппиэтинэһи сүгэбит. Ити хас биирдии төрөппүт миссиятынан эрэ буолбакка, былаас уорганнарын, педагогтар, уопсастыбаннас эмиэ сүрүн соругунан буолар. Биһиэхэ оҕолорбутугар куттал суоһаабата, кинилэр байылыаттык олоруулара – саамай сүрүн сыалбыт. Өрөспүүбүлүкэ салалтата хас биирдии оҕо бу олоххо бэйэтин миэстэтин буларыгар, дьоллоох оҕо сааһы көрсөрүгэр толору кыаҕын ууран кыһаллар. Кинилэргэ анаан үөрэх кыһалара, чэбдигирдии уонна сынньалаҥ кииннэрэ, эбии үөрэхтээһин тэрилтэлэрэ, оҕо технопааркалара тутуллаллар. Социальнай харалтаны тупсаран, оҕолоох ыалларга көмө оҥоһуллар, дьиэ кэргэн уйгута улаатарыгар былааннамыт үлэ уо.д.а. миэрэлэр ылыллаллар.

Күндү доҕоттор! Бу бэлиэ күҥҥэ эһигини барыгытын үүнэр көлүөнэ дьылҕатын туһугар туора турбакка, хас биирдиигит кыһамньылаах, эппиэтинэстээх буоларыгар ыҥырабын!

Саха сирин хас биирдии кырачаанын оҕо сааһа умнуллубаттык уонна туох да кыһалҕата суох аастын! Онуоха биһиги, улахан дьон, оҕолорбут дьоллорун туһугар барыны бары гыныахтаахпыт. Оҕолорбутун харыстаатахпытына, көмүскээтэхпитинэ эрэ өрөспүүбүлүкэбит уонна дойдубут инникитин тутар кыахтаахпыт.

Тарҕат:

Добавить комментарий