Войти

Войти

Туох барыта бэйэ-бэйэҕэ эрэнииттэн уонна доҕордоһууттан саҕаланар. Бүгүн эһиэхэ эдэр эрчимнээх, саҥа саҕалааччы урбааньыттар устуоруйаларын билиһиннэрэбит.

Кэнники кэмҥэ дьон-сэргэ туох да булкааһа суох, айылҕа биэрбитинэн ыраас, натуральнай аска-үөлгэ талаһар, хаачыстыбаны кытаанахтык ирдиир буолла. Дьон аһыыр аһыгар, доруобуйатыгар болҕомтолоохтук сыһыаннаһар буолбута – кэм ирдэбилэ. Соторутааҕыта Хаҥалас Булгунньахтааҕын саҥа саҕалаан эрэр эдэр урбаанньаттыр – Василиса Диодорова уонна Андрей Федоров “Кытыл” диэн олохтоох астан полуфабрикаттары оҥорон таһаарар саҥа сыаҕы арыйдылар. Кинилэр оҥорон таһаарар бордууксуйалара үрдүк хаачыстыбаннан эрэ буолбакка, технологтар идэлээх таһымнарынан уратылаах.

kyt7

Барыта хайдах саҕаламмытай?... “Биһиги олох оҕо эрдэхпититтэн доҕордоһобут, оҕо сааспыт ураты кэрэ айылҕалаах Өлүөнэ эбэ хаҥас кытылыгар сытар Эбэ алааһыгар ааспыта. Бу алааска биһиги төрөппүттэрбит күн хара тахсыаҕыттан, бөтүүк бастакы хаһыытыттан ыла сүөһү көрөн сопхуоска ыанньыксыттаабыттара, онно биһиги күүс-көмө буоларбыт. Оҕотуттан оҕонньоругар тиийэ сайылык күүстээх үлэтин күн киириэр дылы үөрэ-көтө үмүрүтэрбит, оттон киэһэ үүттээх чэйи иһэ-иһэ ийэлэрбит интэриэһинэй кэпсээннэрин иһийэн олорон истэрбит. Быыһыгар оҕо-оҕо курдук төрөппүттэрбититтэн кистээн сөрүүн ууга умсан, эти-сиини сөрүүккэтэн, дуоһуйа сөтүөлүүрбүт. Биһиги – айылҕа оҕолоробут. Иккиэн биир оскуолаҕа үөрэммиппит, хойукку дылы дьиэ тастыы олорбуппут, ол эбэтэр олохпут тухары доҕордоһон кэллибит”.

kyt8

kyt10

kyt11

Андрей Саха политехническэй лиссиэйигэр шеф-поварынан үлэлиир, асчыт саамай үрдүк – алтыс таһымын баһылаабыт, карвинг көрүҥэр өрөспүүбүлүкэ эрэ таһымнаах буолбакка, Бүтүн Арассыыйатааҕы араас күрэхтэр хас да төгүллээх кыайыылааҕа, оттон Василиса билигин иккис оҕотун көрөн олорор.

kyt12

Биир үтүө күн бэйэ дьыалатын арыйан, бэйэ туһугар үлэлииргэ улахан толкуйга түспүттэр. Араас олоххо киллэрэр санааны тобулан көрбүттэр. Өр мөккүһэн, балай эмэ ыраҥалаан көрөн баран, “Кытыл” диэн полуфабрикаттары оҥорор сыаҕы арыйарга баһыыраммыттар. Билигин “Кытыл” сыах пельменнэри, куурусса уонна ынах этиттэн тиэптэллэри, ынах этиттэн уонна балыктан кэтилиэт арааһын, фрикаделькалары уо.д.а. нэһилиэнньэҕэ хамаҕатык барар, минньигэс астары оҥорон таһаарар.

kyt

kyt2

Сыах бастаан арылларыгар эдэр урбаанньыттар “Мин биисинэһим” кииҥҥэ тиийбиттэр. Онно, саҥа саҕалаан эрэр урбаанньыттарга олус көмөлөспүттэр, “Сөп түбэһии декларациятын” (“Декларация соответствия”) сорох чааһын уйуммуттар. Анал куонкуруһу ааһан, “Биисинэс инкубатор” дистанционнай резиденэ буола түспүттэр.

kyt3

kyt4

Маны таһынан, эдэр урбаанньыттар кыахтарын, баҕаларын уонна харахтарыгар умайар уоттарын көрөн, “Сахаагропродукт” тэрилтэ итэҕэйэн көмөлөспүт. Онон урбанньыттар махталлара муҥура суох.

kyt5

kyt6

Кинилэр кэнэҕэһин олохтоох оҥорон таһаарааччылары өссө да өйүөхтэрэ, оттон “Кытыл” куорат олохтоохторун эрэ буолбакка, атын улуус олохтоохторун эмиэ бэйэ аһынан хааччыйар кыахтаныахтара диэн ис сүрэхтэриттэн эрэнэллэр. Биһиги саҥа саҕалааччы урбаанньыттарга ситиһиилэри баҕарабыт, туохтан да чаҕыйбакка, инники сыалгытын ситиһэргэ эрэллээхтик хардыылааҥ диэн алгыыбыт!

Өскөтүн “Кытыллары” кытары сибээстэһиэххитин баҕарар буоллаххытына,

89142895576 төл.эрийиҥ, инстаграмҥа сирэйдэрэ @kytyl_ykt

Тарҕат:

Добавить комментарий