ХИФУ устудьуоннарын уопсайыгар хоруона хамсыга маассабайдык тарҕаммытынан куорат борокуратуурата административнай дьыаланы көбүтэн, 100 тыһ. солк. ыстырааптаата. Бу туһунан СӨ Борокуратууратын пресс-сулууспата иһитиннэрэр.
“Дьаҥ көрдүгэнниригэр күн ахсын кыраадыстарын кэмнээбэтэхтэрэ, бэйэ изоляциятын эрэсиимин тутуспатахтара, бачча ыарахан эпидемиологиескэй балаһыанньа кэмигэр бу иннинэ олоро сылдьыбатах устудьуоннары уопсайга киллэрии күөртээбит”, - диэн борокуратуура иһитиннэрэр.
Борокуратуура бэрэбиэркэтин кэмигэр 82 устудьуон ыалдьыбыта биллибит, олортон 79 түгэн – биир уопсай иһигэр тарҕаммыт. ХИФУ ректорыгар административнай дьыаланы көбүтэллэрин туһунан сэрэтии биэрбиттэр. Маны таһынан, быраабы араҥаччылыыр уорганнар санитарнай-эпидемиологическэй быраабыланы кэһии чахчытынан холуобунай дьыаланы көбүтээри процессуальнай бэрэбиэркэни ыыталлар.
