Ил Дархан Айсен Николаев сарсыардааҥҥы брифинг кэмигэр өрөспүүбүлүкэҕэ эпидемиологическэй туругу билиһиннэрдэ.
-- Хамсыкпыт халбарыйар санаата суох, ыарыы син биир тарҕана турар. Бу өрөбүллэргэ биһиэхэ номнуо уопсайа 3 тыһ. тахса киһи ыалдьыбыты билиннэ. Уопсайа хамсык кэмигэр Саха сиригэр 3122 киһи сутулунна, олортон бүтэһик сууккаҕа 85 саҥа коронавирустаабыт киһи бигэргэннэ: Дьокуускайга – 71, Уус Алдаҥҥа – 4, Хаҥаласка – 3 уонна кэккэ улуустарга биирдии киһи ыарыйда. Билигин 24 киһи ыархана туруктаах сытар, олортон биэс киһи ИВЛ аппараатыгар холбонон сытар. Өрөспүүбүлүкэҕэ ыалдьыбыт дьон 23 % — оҕолор. Дьокуускайга ыарыыбыт арыый намтыы сылдьан баран, эмискэ үрдээтэ, ити миигин дьиксиннэрэр. Ыарыы намтаан эрэр эҥин диэн чэпчиир табыллыбат, хайаан да харыстанар мааскалаах сылдьыҥ. Төһө даҕаны бу өрөбүллэргэ ыарыһах ахсаана эмиэ эмискэ эбиллибитин иһин, ааспыт нэдиэлэтээҥҥи хааччахтар үчүгэй динамиканы аҕалыахтара диэн эрэнэбин, - диэтэ Айсен Сергеевич.
Бэс ыйын 15 күнүнээҕи туругунан, өрөспүүбүлүкэҕэ ыарыһах ахсаана — 3122 (+85)
Үтүөрбүттэр —1834 (+40)
Өлбүттэр — 20 (+0)
