Вице-премьер Татьяна Голикова иһитиннэрбитинэн, коронавирустан аан бастакы Арассыыйа вакцинатын судаарыстыбаннай бэлиэтээһин уонна вакцинаны бэйэтин бэлиэтээһин бу атырдьах ыйыгар ыытыллыахтаах. Оттон маассабайдык тарҕатыы балаҕан ыйыгар буолуоҕа.
Вакцинаны Гамалей аатынан эпидемиология уонна микробиология билим-чинчийэр киинэ айбыт. Бу иннинэ киин дириэктэрэ, академик Александр Гинцбург иһитиннэрбитинэн, вакцинаны аан бастаан баҕа өттүнэн сөбүлэспит киин бэйэтин үлэһиттэригэр ыам ыйыгар тургуппуттар, оттон билигин оборона министиэристибэтин кытары маассабайдык клиническэй чинчийиини ыыта сылдьаллар.
“Быһа барыллаан саҥа вакцинаны судаарыстыбаннайдык регистрациялааһын атырдьах ыйыгар ыытыахтара, оттон бырамыысалыннай мастааптаахтык вакцинаны оҥорууну балаҕан ыйыгар ыытарга сабаҕалыыбыт”, - диэн Голикова коронавируска сыһыаннаах ыытыллыбыт мунньахха эппит.
Саҥа вакцинаны айыыга Гамалей аатынан киин эрэ буолбакка, вакцина атын варианнарын Роспотребнадзор “Вектор” научнай киинэ (Новосибирскай) уонна ФМБА Санкт Петербурдааҕы вакцина уонна сыворотка института үлэлэһэ сылдьар. “Векторга” номнуо клиническэй чинчийиини балаҕан ыйыгар дылы түмүктүүрдүү ыыта сылдьаллар, оттон былаан быһыытынан судаарыстыбаннай бэлиэтээһини балаҕан ыйыгар түмүктүөхтээхтэр. Ол кэннэ тута маассабайдык таһааран барыахтара.
