Ил Дархан Айсен Николаев сарсыардааҥҥы брифинг кэмигэр өрөспүүбүлүкэҕэ эпидемиологическэй балаһыанньаны билиһиннэрдэ.
-- Хамсык саҕаланыаҕыттан өрөспүүбүлүкэҕэ 3199 киһи сутулунна. Ааспыт сууккаҕа саҥа 77 коронавирустаабыт киһи бигэргэннэ: 62 ыарыһах – Дьокуускайга, 7 – Хаҥаласка, 5 – Намҥа уонна 3 киһи Бүлүүгэ. Өрөспүүбүлүкэ стационардарыгар 853 киһи эмтэнэ сытар, ол иһигэр киин куорат балыыһаларыгар – 660. 21 киһи ыарахан туруктаах сытар, 5 киһи ИВЛ аппараатыгар холбонно. Хомойуох иһин, 3 киһи суорума суолланна.
Киһи үөрэрэ диэн – ааспыт сууккаҕа хаһааҥҥытааҕар да элбэх киһи үтүөрэн таҕыста: Дьокуускайга – 84, Алдаҥҥа – 14, Ленскэйгэ – 12, Намҥа – 2 ыарыһах. Уопсайа хамсык кэмигэр 1956 киһи үтүөрдэ.
Кэккэ улуустарга балаһыанньа дириҥээн иһэр. Бэҕэһээ видеоконференц сибээһинэн улуус баһылыктарын кытары мунньахтаабыппыт. Уус Алдан, Үөһээ Бүлүү уонна Ньурба улууһун баһылыктара кэнники кэмҥэ ыарыы тарҕаныыта сытыырхайан иһэринэн, кэккэ хааччахтары киллэрэргэ туруорсубуттара, ону миэстэтигэр бэйэлэр көрөн быһаарыахтара. Тыа сиригэр Дьокуускай куораттан ыарыыны таһыы элбээтэ, сүрүннээн оҕолор биллибэккэ тиийэн сутуйаллар. Онон улууска барааччылар туох баар миэрэни ылаллара ирдэнэр. Дьокуускайга балаһыанньа тубустаҕына, улуустарга да дьаҥ туруута намырыа диэн эрэнэбит.
Бэс ыйын 16 күнүнээҕи туругунан:
3199 (+77)киһи коронавирустаата, 1956 киһи үтүөрдэ (+122), 23 киһи өллө (+3).
Ааспыт суукка устатыгар өрөспүүбүлүкэ лабораториялара 2709 ковид анаалыһын оҥорбуттар.
