Саха сиригэр ааспыт суукка устатыгар 48 саҥа коронавирустаабыт киһи бигэргэннэ, 105 киһи үтүөрэн таҕыста, икки киһи суорума суолланна. Бу туһунан өрөспүүбүлүкэтээҕи оперативнай штаб иһитиннэрдэ.
36 киһи Дьокуускайга ыалдьыбыт, 3 киһи – Мииринэй оройуонугар, иккилии ыарыһах Алдан, Амма, Үөһээ Дьааҥы уонна Чурапчы улуустарыгар, биир киһи Бүлүү улууһугар коронавируһунан ыалдьыбыттара биллибит. Ыалдьыбыт дьон бары эмтэнэллэр, кинилэрдиин алтыспыт дьону изоляцияҕа ыыппыттар уонна анаалыстыыллар. Уопсай хамсык кэмигэр Саха сиригэр 4315 киһи коронавирустаабыт, олортон 3392 (78,6 %) – Дьокуускайга бэлиэтэммит.
Бэҕэһээ 105 киһи толору үтүөрэн тахсыбыт: 88 киһи – Дьокуускайга, 7 – Мэҥэ Хаҥаласка, 4 – Уус Алдаҥҥа, 3 – Нерюнгрига, 2 – Үөһээ Халымаҕа уонна биир ыарыһах Алдаҥҥа үтүөрбүт. Хамсык кэмигэр уопсайа биһиэхэ 3674 киһи үтүөрбүт.
Хомойуох иһин араас хроническэй ыарыылаах икки киһи коронавирустан өлбүтэ бигэргэннэ. Бу кэм устата 38 киһи коронавирустан сылтаан өллө. Билигин даҕаны 34 киһи ыарахан туруктаах сытар. Суукка устата өрөспүүбүлүкэ лабораториялара 2542 анаалыһы оҥордулар.
Бүгүҥҥүттэн ыла хааччахтааһыны көтүрүү иккис түһүмэҕэр киирдибит. Бу күнтэн ыла сайыҥҥы кафелар, эргиэн кииннэрэ (фудкортартан уонна оҕо оонньуур саалаларыттан ураты), оптуобустар сырыылара оннугар түстэ. 65 саастарын ааспыт эрэ дьон дьиэҕэ хааллан олоруохтаахтар. Уулуссаҕа, уопсастыбаннай сирдэргэ мааска эрэсиимэ тутуһуллуохтаах. Судаарыстыбаннай уонна муниципальнай сулууспалаахтар, тэрилтэлэр дьаҥ тарҕамматын инниттэн уунан олорон үлэлииллэригэр сүбэлииллэр. Ыарыы өссө да аттыбытыгар баар, онон чэпчээн өрө тыынар өссө да эрдэ.
