Мииринэйгэ хоруона хамсыгын балаһыанньата өссө да уустук. Дьон бэйэ изоляциятын тутуспатыттан ыарыы намтыыр санаата суох.
Бүтүн дьиэ кэргэнинэн ыалдьаллара элбии турар. Улуус киин куоратыгар эрэ буолбакка, хамсык Айхалга уонна Удачнайга эмиэ тиийбитэ ыраатта.
Бастаан тымныйбыт курдук, кыраадыстаан балыыһаҕа киирэллэр. Бастакы диагноз – ОРВИ эбэтэр сэбиргэхтэтии. Эмчиттэр кинилэр күөмэйдэриттэн уонна мурунннарын сарыыларыттан мазок ылан, олохтоох иммунологическай лабораторияҕа тургуппуттарын кэннэ КОВИД-19 ыалдьыбыттара биллэр. Ол анаалыһы салгыы ыытан бигэргэтэллэр.
Билиҥҥи туругунан, инфекционнай балыыһаҕа – 80-ча, провизорскай салааҕа – 30, обсерватордарга – 200-кэ тиийэ киһи сытар. Хомойуох иһин, ааспыт нэдиэлэҕэ, реанимацияҕа ИВЛ аппарааттарыгар холбонон сыппыт үс ыарыһах өллө. Мииринэйгэ хоруона хамсыга туруоҕуттан ыла, балтараа сүүс кэриҥэ киһи ыалдьыбыт. Олортон аҥаардара үтүөрдэ. Ол эрэн, балаһыанньа сымнаабата. Реанимацияҕа билигин биир киһи сытар. Эрэсиими сымнаппыттарын түмүгэр, бэрт ахсааннаах киһи мааскаланар. Бэрчээккэлэнээччи суоҕун кэриэтэ. Маҕаһыыҥҥа мааската суох киирээччини тохтоппоттор. Күн бүгүн, пааркаҕа киирэр бобуулаах диэн биллэрии турар да, онно дьон дьаарбайалларын кубулуппаттар.
Дьон тоҕуоруһар сирдэригэр – Таҥара дьиэтин скверигэр, фонтан аттыгар оҕо-аймах толору. Киэһэ ахсын уулуссаларга массыына ыы-быччары, бэлисипиэттээх, скутердаах, самокаттаах – буолунай. Түүннэри куорат олоҕо оргуйан олорор.
Уопсайынан, “Дьиэҕэр олор” диэн ыҥырыы, манна туох да күттүөннээх сабыдыала суох.
Мииринэй куорат олохтоохторо бэрээдэги тутуспат буолууга, соччото суох холобурдары көрдөрөрүн кубулуппат.
Мөкү сонуннар ортолоругар биир үтүө сонун баар буолла.
Бу – Мииринэй балыыһатыгар өрөспүүбүлүкэ доруобуйатын харыстабылын министиэристибитэтиттэн саҥа реанимационнай массыына кэлиитэ буолла. Хоруона хамсыгын утары охсуһууга бу реанимамобиль суолтата сүҥкэн.
Биэс суһал көмө массыыналарыттан үһэ эрэ нэһиилэ үлэлиир куоракка, тоҕоостоох кэмигэр, көмө оҥорбуттарыгар улахан махтал.
Станислав Алексеев, Мииринэй куората. МЦРБ саайтыттан уонна ааптар хаартыскалара.
