Ааспыт суукка устатыгар өрөспүүбүлүкэҕэ 37 саҥа коронавирустаабыт киһи бигэргэммит. Бу туһунан Айсен Николаев брифинг кэмигэр кэпсээтэ.
“Дьокуускайга 29 киһи коронавирустаабыта бигэргэннэ. Ити ыам ыйын 15 күнүттэн саамай кыра көрдөрүү. Үс киһи – Дьааҥы улууһугар, 2 ыарыһах – Мэҥэ Хаҥаласка бигэргэннэ уонна биирдиин ыарыһах сорох улуустарга булулунна. Бу өрөспүүбүлүкэҕэ ыам ыйын 20 күнүттэн саамай намыһах көрдөрүү. Инньэ гынан, хамсыгы бохсор суһал ыстаап үлэтэ көдьүүстээх диэн тоһоҕолуохха наада. Ол да буоллар, ыарыы кутталы үөскэппэт диэн чуумпурарбыт наада суох. Билигин 36 киһи ыар туруктаах сытар, олортон 11 киһи ИВЛ аппараатыгар холбоммут. Кинилэр бары саастаах дьон, урууларыттан сыстыспыттар”, - диэтэ Айсен Сергеевич.
Кини хааччахтыыр миэрэлэр үһүс түһүмэхтэрин от ыйын 15 күнүттэн саҕалыахха сөбүн эттэ. Онуоха бары харыстанар миэрэлэри тутуһуохпутун наада. От ыйын 6 күнүнээҕи туругунан, өрөспүүбүлүкэҕэ хамсык кэмигэр уопсайа 4504 киһи коронавирустаабыт.
