Дьокуускайдааҕы килиэп кэмбинээтэ СО РАН Криолоитозона биологическэй кыһалҕаларын институтун кытары лабыкталаах килиэби оҥорон таһаарда. Бу туһунан ТХМ пресс-сулууспата иһитиннэрэр.
“Биһиги доруобуйаҕа туһалаах, иҥэмтэлээх аспыт лииньийэтэ хаҥаан иһэр. Саҥа килиэппит оруостан уонна бурдуктан күөбүллэммит, онно лабыкта бороһуога эбииликтээх, венскэй солод уонна кориандр булкаастаах. Ол килиэпкэ элбэх иҥэмтэлээх веществону биэрэр уонна өр кэмҥэ килиэп буортуйбакка турарын хааччыйар”, - диэн ЯХК маркетинг салаатын бренд-менеджэрэ Елена Марк кэпсиир.
Килиэби астааччылар этэллэринэн, лабыкталаах килиэп 7 күн устата туох да буолбакка, бары иҥэмтэлээх хаачыстыбатын сүтэрбэккэ туруон сөп. Маныаха килиэпкэ ханнык да химия булкааһын туһамматтар. Лабыкта бороһуогар бактерияны утарар ас булкадыһыга баар буолан өр турар эбит. Лабыкта А уонна С битэмииннэринэн уонна микроэлеменнэринэн (тимир, барий, алтан, хром, титан, марганец, никель, дьуот уо.да.) олус баай. Лабыктаны куртах-оһоҕос, щитовиднай былчархай ыарыылаахтар, иммунитеттара мөлтөх, тыынар уорганнара ыалдьар, тирии ыарыһахтар уонна кыайан утуйбат, кыйытта сылдьар, психическэй күүрүүлээх дьон сииллэригэр ордук барсар эбит. Маны таһынан, лабыкталаах килиэп организмтан куһаҕан токсиннары таһаарар. Инньэ гынан, бу саҥа лабыкта булкаастаах килиэби ордук спортсменнар, саастаах дьон уонна ыарахан үлэҕэ сылдьааччылар сииллэригэр сүбэлииллэр. Саҥа килиэп номнуо ЯХК фирменнэй маҕаһыыннарыгар атыыга тахсыбыт, итиэннэ эрдэттэн сайаапкаласпыт биирдиилээн маҕаһыыннарга атыыга турар.
