Войти

Войти

Мииринэйдээҕи «Новай» сопхуос ТХМ «Сахаплемобъединение» уонна «Туймаада» агропромышленнай хампааньа самалыктара буолан турар.

ТХМ-ҥа барбыт «Новай» ХЭТ, дьэ хайдах дьаһанан олорор диэн долгуйааччы үгүс. Тэрилтэҕэ 1700 киһи олорор Арыылаах сэлиэнньэтин инникитэ сытар.

Yлэhиттэр саҥа көспүт тэрилтэлэриттэн хамнастарын син ылыталаан эрэллэр эбит. Сүөһүнү иитиини «Сахаплемобъединение» сүрүннүүр. Көтөр баабырыкатынан, атыынан-эргиэнинэн “Туймаада” ҮПХАХ дьарыктанар. Ынах сүөһүнү Арыылаахтан чугас, Былдьыры сайылыгар аҕалан, үрүҥ илгэни дэлэтэ олороллор. Урукку курдук, Сунтаар диэки, Күөллээх сайылыгар быйыл сүөһү сайылаабата.

Сайын ураты эппиэттээх кэмэ – от үлэтин кэмэ үгэннээтэ. Сайын хайдах дьаhанаҕын да, кыстыгыҥ оннук буолара чуолкай. «Новай» ХЭТ дороххой уонна сүмэлээх аhылык бэлэмнээhинин дьэ саҕалаан эрэр.

Быйылгы дьылга балтараа тыһыынча туонна от бэлэмнэниэн наада. От былаана биллэ кыччаабыт. Урут “Новай” сопхуос 3.000 туонна оту оттуура. 2020 сыллааҕы былааҥҥа 400 туонна сиилэс эмиэ киирсэр. Онно анаан-минээн, чугастааҕы бааһыналарга люцерна, эбиэс-горуох ыспыттара дьэ силигилээн үүнэн эрэр.Бөтүрүөп ааста. Аны Борокуоппайап Таҥаратын ардаҕа кэлиэ турдаҕа. Онуоха диэри күн-дьыл балай эмэ турбалаан биэрэрэ буоллар диэн киччэм санаа баар.                    

Оттуур сир татым.

Арыылаах сэлиэнньэтин анныгар хаһаайыстыба үс сүүсчэкэ гектардаах сиргэ механизированнай звенонан оттуур. Эбиитин сиилэс бэлэмниэхтэрин наада.

Мииринэй оройуонун сирэ-уота – чэҥкир үрэх, алыы, маар, дүөдэ сирдэр диэн ахтан турабын. Биллэн турар үрэх ото олус соппоҥ. Маннык оттон кыстык саҕана сүөһү солбонуйар.

2009 сыллаахха Сунтаар сириттэн 700 туонна бастыҥ хааччыстыбалаах от тиэллибитэ. Оччолорго кыстыгы этэҥҥэ туораабыттара.

2020 сылга «Новай» ХЭТ Сунтаартан от тиэйиитин кээмэйин лаппа кыччатабын диэн биллэрэн турар. Дьиҥ балаһыанньаны учуоттаабатахтар. Новайдар үрэхтэргэ оттуур сирдэрэ уу, мараха, кута-бадараан буолан тураллар. Оттуур сир аҕыйах. Эмиэ кыһалҕа. Дойду сир иҥэмтиэлээх ото ирдэнэр. Уонунан сыллар тухары, новайдар, ыаллыы сытар Сунтаар улууhун Куокуну, Кириэстээх, бэл Тэҥкэ сыһыы-алаас сирдэриттэн от тиэйтэрээччилэр.  

Дьэ ити курдук, хаһан эрэ алмаастаах хампаанньа самалык хаһаайыстыбата буола сылдьыбыт «Новай» саҥа олоххо үктэннэ.                           

Кини инники дьылҕатынан, Саха Өрөспүүбүлүкэтин Тыатын хаһаайыстыбатын министиэристибэтэ ыкса дьарыктанан эрэрэ сөптөөх дьыала.

Станислав Алексеев, Мииринэй куората.  

 

Тарҕат:

Добавить комментарий