Саха АССР төрүттэммитэ үбүлүөйдээх 100 сылыгар сыһыаран, Ыччат дьыалаларыгар уонна социальнай коммуникацияларга министиэристибэтэ сүүс бастыҥ уопсастыбаннай көҕүлээһини талар күөн күрэһи биллэрдэ.
Куонкурус бу атырдьах ыйыгар буолар. Тутаах усулуобуйа – Саха сирин экэнэмиичэскэй сайдыытын эйгэтигэр уонна судаарыстыбаннай, муниципальнай салайыыга сыһыаннаах олоххо киирбит судаарыстыбан уопсастыбаннай көҕүлээһин буолуохтаах. Манна кэмиэрчэскэйэ суох тэрилтэлэр уонна муниицпальнай тэриллиилэр, биирдиилээн да дьон кыттыахтарын сөп.
Маннык куонкурус 2016 сылтан ыытыллар, түөр күрэххэ уопсайа 69 уопсастыбаннай көҕүлээһин кыайыылаах тахсыбытын санатар тоҕоостоох. 2022 сылга тиийэн көҕүлээһин лоп курдук 100 буоларын былаанныыллар.
Былырыыҥҥыттан саҕалаан кыайыылаахтары интэриниэт куоластааһын түмүгүнэн быһааран, “Бастыҥ гражданскай көҕүлээһин” бэлиэнэн наҕараадалыыллар, абсолютнай кыайыылаахтарга успуонсардар сыанлаах бириистэрэ туттарыллар. Түмүккэ “Сүүс бастыҥ уопсастыбаннай көҕүлээһин” диэн кыайыылаахтары уонна успуонсардары билиһиннэрэр “Бочуот кинигэтэ” бэчээттэниэхтээх.
