Войти

Войти

Алисия Пак – Саха сирин балекка оскуолатын төрүттээччитэ, маҥнайгы дириэктэрэ Наталья Посельская сиэнэ. Үс саастааҕар кинини эбэтэ балет саалатыгар аҕалыаҕыттан кыысчаан балет ускуустубатын кэрэ эйгэтигэр курдаттыы ылларбыта. Эбэтэ олохтон туораабытын кэнниттэн Алисия дьарыгын салгыырга, кыайыыга дьулуһарга быһаарыммыта. Ол кэмтэн эдэр балерина үрдүк таһымнаах куонкурустарга ситиһиилэннэ, Арассыыйа уонна кыраныысса таһыгар ыытыллар куонкурустарга кытынна.

- Дьокуускай куоракка төрөөбүтүм. Быйыл хос эбэм, эбэм Аксения уонна Наталья Посельскаялар ааттарын сүгэр Дьокуускайдааҕы балет оскуолатын маҥнайгы кууруһун устудьуона буолуом. Хоту дойдуга балет идэтийбит оскуолатын төрүттээбит киһи -- мин эбэм, онон киэн туттабын! Убайбын Аркадийы кытта Посельскайдар ускуустубаҕа төрүттэрин үһүс көлүөнэтэ буолабыт. Этэргэ дылы, кыһыл оҕо эрдэхпититтэн бу кэрэ ускуустубаҕа сыстаҕаспыт. Кырабар эбэм устуудьуйатыгар күн ахсын кэриэтэ сылдьарым. Аҕыс саастаахпар ийэм Ирина Пак салайар колледжыгар үөрэнэ киирбитим. Ирдэниллэр быраабыланы тутуһан, хоннохтоохтук ылсан дьарыктаммытым. Саамай сөбүлүүр уруогум – кылаассыка үҥкүүтэ. Манна эт-хаан бөҕө туруга, имигэс буолуу уонна тулуур ирдэнэр. Балеты ис сүрэхпиттэн таптыыбын уонна онтум хардатын эмиэ тутабын. Ускуустуба бу көрүҥэр миэстэбин буллум уонна инники да олохпун ону кытта ситимниир былааннаахпын.

2016 сыл ордук тэтимнээхтик ааспыта. Онно мин “Күн Куо” диэн өрөспүүбүлүкэтээҕи куонкурус 3-с истиэпэннээх лауреата буолбутум. Япония Тойота куоратыгар Аан дойдутааҕы куонкуруска, Новосибирскайдааҕы судаарыстыбаннай хореографическай училище үбүлүөйүгэр кыттыбытым.

2018 сыллаахха “Дивертисмент” диэн аан бастакы куонкуруска кыттан, соһуйуом иһин, Гран-при хаһаайката буолбутум. Алматыга ыытыллыбыт “ОРЛЕУ” диэн Аан дойдутааҕы куонкуруска кыттан, Алматы хореографическай училищетын үөрэнээччилэрин кытта билсибитим. Билигин да казах доҕотторбунуун ситими тутабыт, уопуппутун атастаһабыт. Ити куонкуруска икки боруонса уонна биир кыһыл көмүс мэтээли ылбытым. Маны таһынан Монголияҕа Улан-Баторга Аан дойдутааҕы куонкуруска кыттан, дипломант аатын ылбытым. Былырыын үһүс куурус устудьуона Ваня Матвеевтыын Соҕуруу Корея Сеул куоратыгар эмиэ Аан дойдутааҕы куонкурус лауреаттара буолбуппут, -- диэн эдэр балерина кэпсиир.

Санатан эттэххэ, Алисия үөрэнэр кыһата СӨ Үүнэр көлүөнэтин тус сыаллаах пуондатын кытта быһаччы ситимнээх. 1995 сыллаахха ыам ыйын 30 күнүгэр өрөспүүбүлүкэ бастакы бэрэсидьиэнэ Михаил Ефимович Николаев Ыйааҕынан колледж тэриллэн, пуонда үбүнэн үөрэнэр уонна олорор киэҥ-куоҥ, аныгылыы тутуулаах дьиэлэр дьэндэйбиттэрэ.

Бу кэм иһигэр эдэр талааннары булууга, сайыннарыыга, үрдүк култууралаах, духуобунас өттүнэн баай өйдөөх-санаалаах саҥа көлүөнэни үүннэриигэ элбэх бырайыак олоххо киирдэ. Колледж иитиллээччилэрэ “Сириус” үөрэхтээһин киинин айар бырагыраамаларыгар кытталлар, учууталлар уонна концертмейстердар идэлэрин үрдэтэр куурустарга үөрэнэллэр. Балет кыһата “Ускуустуба. Хореография” диэн хайысхалаах, талааннаах оҕолору булуу уонна өйөөһүн эрэгийиэннээҕи киинин тирэх былаһаакката буолла. Бырайыактары “Инники кэскил туһугар” бырагыраама чэрчитинэн АЛРОСА АХ үбүнэн өйүүр.

“Хас сыл ахсын биһиги Сочига “Сириус” үөрэхтээһин киинигэр сылдьабыт. Балет ускуустубатын биллиилээх маастардарын маастар-кылаастарыгар сылдьабыт. Ордук Татьяна Олеговна Павлович маастар-кылааһын чугастык ылынныбыт. Киниттэн олус күүстээх эниэргийэ кэлэр. Нууччалыы эттэххэ, харизма, эмоция курдук киһи иэйиитигэр болҕомтобутун уурар буоллубут. Маны таһынан балет эйгэтэ бэркэ билэр балерината, Улахан тыйаатыр артыыһа, Ла-Скала Милан тыйаатырын сулуһа Светлана Захарова маастар-кылааһыгар сылдьыбыт биһиги оскуолабыт түөрт үөрэнээччититтэн биирдэстэрэ буолбут дьоллоохпун. Хас биирдиибит бэйэбит вариациябытын үҥкүүлээбиппит. Маннык таһымнаах маастардары кытта алтыһыы биһиэхэ салгыы үүнэргэ-сайдарга күүһү эбэр, ыраахха кынаттыыр.

Үҥкүү мэтрэ Юрий Николаевич Григорович “Молодой балет мира” диэн үрдүк таһымнаах куонкуруһун иккис туурун ааспыппынан киэн туттабын. Хомойуох иһин, үһүс тууру ааспатым. Салгыы үлэлиэххэ наада. Быйыл “Остуоруйа хонуута” диэн аан бастакы оҕо национальнай балетыгар Удаҕан оруолун толорор чиэскэ тигистим. Премьераны бары долгуйа кэтэһэбит.

Идэнэн үүнүүгэ-сайдыыга үлэлэһэр бары учууталларбар -- чуолаан бастакы педагогум Дария Григорьевна Ивановаҕа -- дириҥ махталбын тиэрдэбин. Кини биһиэхэ кылаассыка үҥкүүтүгэр тапталы иҥэрбит үтүөлээх. Ону тэҥэ Дария Ивановна Дмитриеваҕа, Зинаида Николаевна Поповаҕа уонна Оксана Ивановна Абрамоваҕа истиҥник махтанабын. Биир саастыылаахтарбар ханнык да кэмҥэ баҕа санааны ыһыктыбаттарыгар, үрдүк сыалга эрэллээхтик уонна дьулуурдаахтык айанныылларыгар баҕарабын. Биһиги көлүөнэ иннигэр аартык аһаҕас. Ити тоҕоостоох түгэни мүччү тутумуохпутун наада”, - диэн Алисия эбэн этэр.

СӨ Үүнэр көлүөнэ пуондатын пресс-киинэ

Тарҕат:

Добавить комментарий