Саха сиригэр хоруона хамсыгар сутуллубут киһи уопсай ахсаана 6847 тиийдэ.
Ааспыт суукка устатыгар өрөспүүбүлүкэҕэ эбии48 киһи ыарыйда. Дьокуускайга – 21, Мииринэй улууһугар – 4, Үөһээ Бүлүүгэ – 3, иккилии ыарыһах – Алдан, Горнай, Нерюнгри, Ньурба, Томпо, Хаҥалас уонна Чурапчы улуустарыгар сутуллубуттар. Биирдии ыарыһаҕы Дьааҥыга, Бүлүүгэ, Тааттаҕа, Өлөөҥҥө, Өлүөхүмэҕэ уонна Усуйаанаҕа бигэргэппиттэр. Кинилэри кытары алтыспыт дьон быһаарыллан, изоляцияҕа ыытыллыбыттар. Суукка устатыгар Саха сирин лабораториялара 2765 теһи оҥорбуттар. Уопсайа хамсык саҕаланыаҕыттан 349 600 тест ыытыллыбыт.
Ольга Балабкина этэринэн, медиктэр билигин дьоннорун кытары уоппускаттан кэлэр оҕолору кэтээн көрүөхтэрэ. Кинилэр кэлбит сирдэринэн учуокка туруохтаахтар. Ити оскуолаҕа ыарыы көрдүгэннээбэтин инниттэн ыытыллар. Маны таһынан, үөрэх дьыла саҕаланыаҕыттан тэрилтэлэргэ оҕолору кэтээн көрөргө икки нэдиэлэ устата медүлэһиттэр баар буолуохтара. Ольга Балабкина “маассабай тэрээһиннэр кыкыраччы бобуллан тураллар, тоҕо эрэ сорохтор 50 киһиэхэ диэри мустуохха сөп диэн сыыһа өйдүүллэр” диир.
