М.К Аммосов аатынан ХИФУ бастакы куурус устудьуоннарыттан уопсайга киирии докумуонун хомуйуута балаҕан ыйын 4 күнүгэр диэри уһуоҕа. Бу туһунан университет пресс-сулууспата иһитиннэрэр.
Быйыл 1691 бастакы куурус устудьуона уопсайга киирэрэ былааннанар. Бирикээс балаҕан ыйын 8 күнүгэр тахсыаҕа. Тоҕуоруспат туһугар анал испииһэк оҥоһуллуоҕа.
«Устудьуон уопсайга олоро киириэн иннинэ 2975 солкуобайы онлайн төлүүр уонна Covid-19 анаалыһы ХИФУ Медицинэ институтугар анал кыраапыгынан туттарар», — диэн студгородок дириэктэрэ Степан Павлов иһитиннэрэр.
Үрдүкү куурус устудьуоннара балаҕан ыйын 15 күнүгэр үгэс буолбут үөрэхтээһиҥҥэ көһүү бирикээһэ таҕыстаҕына эрэ уопсайга киириэхтэрэ. 9-с нүөмэрдээх уонна Губин аатынан уулусса 5-с нүөмэрдээх уопсайга киирээччилэр эпидемиологическай балаһыанньа көнүөр диэри атын корпустарынан тарҕатылыннылар.
Күҥҥэ 70 киһи уопсайга киириэҕэ. Миэстэтигэр медосморт, баһаартан сэрэхтээх буолууга инструктаж ааһыахтара, нуорма-быраап аакталарын, уопсайга олоруу быраабылатын, ону тэҥэ коронавирус ыарыытыттан сэрэтэр тэрээһиннэри кытта сиһилии билсиэхтэрэ.
