Саха сиринээҕи онкология диспансерын быраастара оҥорбут “Онкопоиск” диэн скрининниир бырайыактарыгар номнуо 100-тэн тахса киһи кыттыбыт. Ол туһунан Ил Дархан уонна бырабыыталыстыба пресс-сулууспата суруйар.
Ити бырайыак бу күһүн атырдьах ыйын саҥатыгар “Доруобуйа харыстабыла” национальнай бырайыак “Искэн ыарыытын утары охсуһуу” эрэгийиэннээҕи бырагырааматын чэрчитинэн саҕаламмыта. Ол үтүө түмүктээх буолла.
Скрининг чинчийиитэ искэн (араак) ыарыы 6 көрүҥүн булар кыахтаах: тыҥа, быар, оһоҕос (ободочная кишка), простата, дьахтар киэлитин (матка), эмиий искэнин.
“Бу бырайыагы элбэх киһи көрөн чинчийдэрбит диэн саҕалаабыппыт. “Онкопоисксаха.рф” диэн веб-сыһыарыы оҥоһуллубута, онно киирэн бэлиэтэниэххэ наада. Бэлиэтэммит кэннэ көмпүүтэр киһи сааһыттан көрөн хас даҕаны анкыата барыйаанын таһаарар. Өскөтүн ол түмүгүнэн киһи ыалдьар кутталлааҕа билиннэҕинэ, искэн диспансерыгар көрдөрө кэлэргэ ыҥырыы тиийэр. Уорбаланааччы бырааска хаһан, төһөҕө тиийэрин бэйэтэ быһаарар”, -- диэн иһитиннэриигэ суруйаллар.
Бу – пилотнай бырайыак. Онон веб-сыһыарыыга билиҥҥитэ тыҥа араагын скрининэ эрэ киирэн турар (өрөспүүбүлүкэҕэ искэн ыарыытыгар биир бастакы миэстэҕэ сылдьар). Атын бырагыраамалар сыыйа үлэлиэхтээхтэр.
“Билигин анкыатаны 100 киһи толорбутуттан “ыалдьыан сөптөөх” диэҥҥэ үс гыммыттан биирэ хабылынна. Ол түмүгэр 36 киһи көмпүүтэр томографиятын чинчийиитин аасты. Түөрт киһи диспансерга кэлимник көрдөрөр буолла”, -- диэн искэн диспансерын онолог-хирура Петр Никифоров кэпсиир.
Пилотнай бырайыак билиҥҥитэ Дьокуускайга, Дьокуускай таһынааҕы Хаҥалас бөһүөлэгэр уонна Табаҕаҕа үлэлиир. Атын улуустарга сыыйа киириэхтээх.
