Саҥа үөрэх дьыла саҕаланыаҕыттан үөрэх уонна билим министиэристибэтин социальнай ситимнэригэр оҕо уһуйааннарын үлэлэригэр сыһыаннаах 30-тан тахса ыйытыы киирбит. Бүгүн ону министиэристибэ быһааран биэрэр.
Балаҕан ыйын 4 күнүнээҕи туругунан өрөспүүбүлүкэҕэ 219 уһуйаан баарыттан (онно 11266 оҕо сылдьар) олоҕурбут эрэсииминэн 186 уһуйаан арыллыбыт. 33 уһуйааҥҥа дьуһуурунай бөлөхтөр тэриллэн үлэлииллэр (64 бөлөххө уопсайа 735 оҕо хабыллыбыт). Онтон атын уһуйааннарга ититии киирдэҕинэ балаҕан ыйын 10 күнүгэр дылы арыллыахтара. Арай Үөһээ Бүлүү уонна Уус Алдан улуустарыгар хоруона хамсыгынан сибээстээн улуустааҕы суһал бөлөхтөр быһаарыыларынан уһуйааннар балаҕан ыйын 15 күнүттэн арыллыахтара. Оттон Амма улууһугар ититиини биэрии тардыллан, уһуйааннар балаҕан ыйын 14 күнүттэн арыллыахтара. Тулагыга “Кэнчээри” уһуйааҥҥа өрөмүөн үлэтэ ситэ илик буолан балаҕан ыйын 30 күнүгэр биирдэ арыллыаҕа. Бу туһунан үөрэх министиэристибэтин пресс-сулууспата иһитиннэрэр.
