Бу ааспыт нэдиэлэ иһигэр Росгвардия уонна ИДьМ үлэһиттэрэ барыта 3 316 саалаах киһини бэрэбиэркэлээтилэр. Ол туһунан биэдэмистибэ пресс-сулууспата суруйар.
Ити түмүгэр 140 административнай боротокуол толоруллубут, 196 доруоп, 25 буулдьа саа, 159 ботуруон былдьаммыт. Эппиэтинэстээх дьон бэйэлэрин үтүө баҕаларынан 89 сааны уонна 100 ботуруону туттарбыттар.
“Дьон, сүрүннээн, сааны харайыы, илдьэ сылдьыы, регистрациялааһын (РОХа болдьоҕун уһатыы), учуокка туруоруу, тиэйии-таһыы быраабылатын кэһэн эппиэккэ тардыллар”, -- диэн иһиннэриигэ суруйаллар.
Онон сибээстээн, ис дьыала уорганнара манныгы санаталлар. Бултуу барыах иннинэ хайаан да сааны илдьэ сылдьары көҥүллүүр докумуон болдьоҕун көрүллүөхтээх. Саа булгуччу чехоллаах, иитиитэ суох буолуохтаах. Арыгыны испит киһи сааны тутара көҥүллэммэт – ол иһин эмиэ эппиэккэ тардаллар. Сааны-сэби уонна ботуруону көрүүтэ-истиитэ суох хаалларыллыбат, атын киһиэхэ бэриллибэт. Бэрээдэги кэһээччилэр административнай уонна холуобунай эппиэккэ тардыллыахтарын, сааларын былдьатыахтарын, бултуур бырааптарын быстарыахтарын сөп.
