Сыырдаахха баар “Саюри” сыл устата үлэлиир тэпэлииссэ үһүс уочаратын маҥнайгы түһүмэҕэ бүгүн арылынна.
Ол курдук, уопсайа 0,8 гектардаах 4 тэпэлииссэ блога үлэҕэ киирдэ. Манна номнуо томат уонна оҕурсу олордуллубут. Бу саҥа тэпэлииссэлэр көмөлөрүнэн быйыл 860-870 туонна оҕуруот аһын (былырыыҥҥытааҕар 3,5 төгүл элбэх) үүннэриэхтэрэ. Бастакы үүнүүнү алтынньыга ылыахтара. Саха сирин бырабыыталыстыбатын бэрэссэтээтэлин э.т. Андрей Тарасенко “биһиги 2024 сылга дылы олохтоохтору бэйэ аһынан хааччыйарга улахан болҕомтону салгыы ууруохпут, кэнэҕэһин тэпэлииссэ комплекса үүннэрэр оҕуруот аһын арааһын элбэтэр соруктаахпыт” диир.
Билигин тэрилтэ номнуо бырайыак үһүс түһүмэҕин үлэҕэ киллэрэргэ ылыстылар. 1,2 гаа иэннээх 6 саҥа тэпэлииссэ блогун фундаменын оҥорон саҕалаабыттар. Бу 6 тэпэлииссэ 2021 сыл үһүс кыбаарталыгар үлэҕэ киириэҕэ. Билигин “Саюрига” 64 киһи үлэлиир, эһиил манна үлэһит ахсаана 80 буолуохтаах.
